Новости за 12.03.2024

Татарстан Хөкүмәте хаҗга баручы республика мөселманнарын медицина персоналы белән тәэмин итәчәк. «ТР мөселманнары Диния нәзарәте Хаҗ» операторы генераль директоры Ранис Вахитов шулай дип белдерде. Бу хакта «Миллиард.Татар» басмасы хәбәр итә.

Татарстанның Түбән Кама районы башлыгы Рамил Муллин Түбән Кама шәһәренең ике яшь гаиләсенә торак сертификатлары тапшырды. Рузалия һәм Эдуард Петровлар, шулай ук Резеда һәм Радик Ибраһимовлар һәркайсы 4,2 миллион сумлык сертификатка ия булды.

13 мартта, 16.45 сәгатьтә, Республика балалар клиник хастаханәсендә Татарстан мөфтие Камил хәзрәт Сәмигуллин, ТР сәламәтлек саклау министры Марсель Миңнуллин һәм Республика балалар клиник хастаханәсе баш табибы Айрат Зыятдинов катнашында ифтар узачак. Бу хакта медицина учреждениесендә хәбәр иттеләр.

Язучы, тәрҗемәче, ТАССРның атказанган мәдәният хезмәткәре, Татарстан Республикасының Габдулла Тукай исемендәге Дәүләт премиясе лауреаты Лирон Хәмидуллин «Сабан» һәм «Юл» газеталары архивын эзләп табарга кирәк, дигән фикердә.

«Туган авылым» мәчете имам-хатыйбы Нурулла хәзрәт Зиннәтуллин ифтарга йөргән мөселманнар арасында таралган «ифтаритет» дигән шаян гыйбарәгә карата фикерен белдерде.

Россия мөселманнарының рухи лидеры, мөфти шәех Равил Гайнетдин тантаналы шартларда «Рамазан чатыры»н ачты. Бу хакта Россия Мөфтиләр шурасының матбугат хезмәте хәбәр итә.

Бу атна ахырында Татарстанда +5 градуска кадәр җылытачак. Республика Гидрометеорология һәм әйләнә-тирә мохитне күзәтү идарәсе хәбәрендә шулай диелә.

11 март көнне «Ярдәм» фондында журналистлар һәм блогерлар өчен оештырылган «Медиа-ифтар»да Әлмирә Әдиятуллина исемендәге журналистлар бәйгесенә старт бирелде.

Кышын карның күп явуы игенчелек өчен уңайлы шартлар тудырачак. ТР Авыл хуҗалыгы һәм азык-төлек министрлыгының игенчелек тармакларын үстерү бүлеге башлыгы Ирек Садыйков «Татар-информ» агентлыгына шулай дип белдерде.

2024 елны Бөтендөнья татар конгрессы «Шәхесләр елы» дип игьлан итте. Аның кысаларында Ульяновск татар мәдәният үзәгендә күренекле җырчы Әлфия Авзаловага багышланган концерт-искә алу кичәсе узды, дип хәбәр итә Бөтендөнья татар конгрессы матбугат хезмәте.

Казан шәһәре Башкарма комитеты аппараты җитәкчесе Булат Алиев Россия Президенты сайлауларында тавыш биргән казанлылар җәмәгать транспортында бушлай йөри алачак дип белдерде. Бу хакта Казан мэриясе матбугат хезмәте хәбәр итә.

Казан һәм Татарстан мәчетләренең барысында да Рамазан ае барышында җәмәгать белән тәравих намазлары укыла. Моннан тыш аларның кайберләрендә тәравих вакытында Коръән хәтем кылына — Кәлам Шәриф тулысы белән укып чыгыла. Тәравих намазын Коръәнне хәтем кылып уку мөселманнар өчен сөннәт булып тора һәм олы әҗер-саваплар белән бүләкләнә.

Бүген Татарстанда болытлы һава торышы көтелә, урыны белән аз гына кар ява. Бу хакта Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Теләче районында туып-үскән, ветеран журналист Галәветдин Зыятдинов истәлегенә багышланган «Яшь журналист» дип исемләнгән II иҗат бәйгесе игълан ителде. Бу хакта «Теләче-информ» хәбәр итә.

Лениногорскиның «Яшьлек» спорт комплексында Россия Герое Дамир Исламов истәлегенә 2нче тапкыр бокс турниры узды. Бу хакта «Заман сулышы» хәбәр итә.

Түбән Кама хастаханәсендә эшләүче табибларда «Татарча беләм» значогы күрергә була. Бу хакта http://nkamsk-rt.ru/ хәбәр итә.

Татарстан урман хуҗалыгы министры урынбасары Рәис Гомәров Апас районында эш сәфәрендә булды. Анда урман хуҗалыгы темасына киңәшмә узды. Бу хакта «Апастово-информ» хәбәр итә.

Зәй үзәк хастаханәсенең хатын-кызлар консультациясендә йөклелекне өзәргә теләүчеләр белән профилактик эш алып барыла. Хәзер исә хатын-кызлар белән сөйләшүне клиника психологы да башкара. Бу җаваплы хезмәткә махсус курслар үткән белгеч Регина Галимова билгеләнгән. Бу хакта «Зәй яңалыклары» сайтында хәбәр ителә.