Новости за 18.03.2024

29 мартта «Казан Экспо» халыкара күргәзмә залында XII Республикакүләм ифтар узачак. Ифтарга электричкалар йөриячәк. «Ак барс арена» стадионы генераль дирекоры Радик Миңнәхмәтов «Казан Экспо»га бушлай барып җитү өчен, ифтар билетын күрсәтергә кирәклеген әйтте.

Якутия студенты Андрей Сыромятников татар телен һәм республикада яшәүче халыклар вәкилләренең туган телләрен саклау, үстерү өлкәсендә Татарстан Рәисе стипендиясенә лаек булды. Аның күләме 50 мең сум тәшкил итә, дип яза Якут-Саха мәгълүмат агентлыгы.

Казанның 18нче мәктәбендә 12 кешедә кызамык тапканнар. Бу хакта «Татар-информ» агентлыгына Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсендә хәбәр иттеләр.

Татарстан Рәисе Рөстәм Миңнеханов республикада яшәүчеләргә сайлауда катнашканнары һәм Россия Президенты Владимир Путинга теләктәшлек күрсәткәннәре өчен рәхмәт белдерде.

Әлмәттә ир-ат һәм биш айлык сабый өстенә күп катлы йортның соңгы катындагы балконыннан боз төшкән, әлеге уңайдан җинаять эше кузгатылган. Бу хакта күзәтү ведомствосының матбугат хезмәтендә хәбәр иттеләр.

Татарстан башкаласы мэры Илсур Метшин Россия Президентын сайлауда Казан халкының актив катнашуын әйтте.

Казанның 18нче татар гимназиясендә бүгенге «Мөһим сөйләшүләр» дәресе Кырымның һәм Севастопольнең Россиягә яңадан кушылуына 10 ел тулуга багышланды.

23 мартта Калининград өлкә тарихи-сәнгать музеенда танылган татар язучысы, фронтовик шагыйрь Фатих Кәримнең тууына 115 ел тулуга багышланган фәнни-гамәли конференция узачак. Бу хакта Бөтендөнья татар конгрессының матбугат хезмәте хәбәр итә.

Казан федераль университетының Филология һәм мәдәниятара багланышлар институты (Татарстан урамы, 2) 23 мартта 12.00 сәгатьтә Ачык ишекләр көне үткәрә. Бу хакта институтның матбугат хезмәте хәбәр итә.

Татарстанда 18 мартка 09.00 сәгатькә сайлау бюллетеньнәренең 100 процентын эшкәрткәннәр. Тавыш бирүдә 2 480 516 кеше катнашкан, бу республикадагы барлык сайлаучыларның 84,61 проценты дигән сүз, дип хәбәр итә ТР Үзәк сайлау комиссиясе.

Бюллетеньнәр сала торган урналарны бозу очракларыннан соң тавыш бирергә теләүчеләр саны артты. Россия Үзәк сайлау комиссиясе рәисе Элла Памфилова шулай дип белдерде. Бу хакта ТАСС агентлыгы хәбәр итә.

Татарстанда беркетмәләрнең 100 процентын эшкәрттеләр. Якынча нәтиҗәләр буенча, Владимир Путин (үз-үзен тәкъдим итүче) республикада 88,74 процент тавыш җыйган, дип хәбәр итә ТР Үзәк сайлау комиссиясе.

Казан балалар циркы мәктәбе укучылары Франциянең Сен-Поль-ле-Дак шәһәрендә узган халыкара фестивальдә 2 приз яулады.

Төркиядә яшәп иҗат итүче журналист, язучы Айзирәк Гәрәева-Акчура «Татар журналист» сәхифәсенә биргән әңгәмәсендә яшь журналистларга киңәшләре белән уртаклашты.

Камчаткада туристлар төркеме кар ишелмәсе астында калган, ике кеше югалган. Бу хакта Россия Гадәттән тыш хәлләр министрлыгында хәбәр иттеләр.

ТР Дәүләт Советы Рәисе Фәрит Мөхәммәтшин татарстанлыларны Кырымның Россиягә кушылу көне белән тәбрик итте. Үз котлавында ул моның тарихи вакыйга булуын билгеләп үтте.

Үзенең сайлау штабында журналистлар белән аралашканда, Россия Президенты Владимир Путин көчле һәм бәйсез Россия турында хыялланганын сөйләде.

Ульяновск шәһәрендәге Татар мәдәнияте үзәгендә «Татар кызы-2024» бәйгесенең төбәк этабына багышланган очрашу узды. Әлеге бәйге Ульяновск өлкәсенең татар яшьләре «Яшьтиме» оешмасы, «Сембер» эшкуарлар бизнес клубы һәм «Ульяновск өлкәсе татар милли-мәдәни мохтарияте» оештырачак. Бу хакта Бөтендөнья татар конгрессы матбугат хезмәте хәбәр итә.

Яңа президентлык срогы өчен төп максатлар турында сорауга җавап биреп, Владимир Путин, беренче чиратта, махсус хәрби операция бурычларын хәл итәргә кирәклеген билгеләп үтте.

Татарстан Республикасы Рәисе Рөстәм Миңнеханов Кырымның һәм Севастопольнең Россиягә яңадан кушылуына 10 ел тулу уңаеннан мөрәҗәгать итте.

Бүген Татарстанда көндезге температура 0дан +5 градуска кадәр тәшкил итәчәк. Явым-төшемсез алмашынучан болытлы һава көтелә. Бу хакта Гидрометеоүзәкнең матбугат хезмәте хәбәр итә.

Россия хөкүмәтендә кадрлар мәсьәләләре тыныч кына хәл ителәчәк. Бу хакта Владимир Путин үзенең сайлау штабында журналистларның сорауларына җавап биргәндә белдерде.

Мамадышта экстремаль һәм кышкы спорт төрләре паркы ачылды. Шәһәр халкы һәм кунаклары шул ук көнне спорт инвентарьларының прокат пунктына бара һәм трассаларны бәяли алды. Парк хезмәтләреннән оста чаңгычылар һәм сноубордчылар да, яшь спортчылар да файдалана ала. Бу хакта «Нократ» сайтында хәбәр ителә.

Агымдагы елның февраль аена йомгак ясаганда, Әлмәт муниципаль районында 122 сабый дөньяга килүен күрергә була. Шунысы кызык, туучылар арасында җенес буенча бүленеш бертигез - бу чорда 61 кыз бала һәм 61 малай дөньяга аваз салган. Бу хакта «Әлмәт таңнары» хәбәр итә.

Чаллыда яшәүче Фәнизә Нәгыймова, Римма Гайфуллина, Фәнис Мостафин, Фоат Гайфуллин, Лиана Гайфуллина хәрби операциядәгеләргә төрле продуктлардан тиз пешә торган коры ашлар әзерли, окоп шәмнәре ясый. Бу хакта «Шәһри Чаллы» яза.