(Казан, 18 июль, "Татар-информ"). Тәтеш районының Киртәле авылында «Агро-Союз» хуҗалыгы базасында машина белән сыер саву операторлары конкурсы узды. Хезмәтчәннәр мондый чараларга иң яхшыларны ачыклау, осталык серләре белән уртаклашу, тәҗрибә уртаклашу өчен җыела. Бу хакта «Авангард» газетасы яза. Конкурс программасын сәламләү сүзе белән районның авыл хуҗалыгы һәм азык-төлек идарәсе башлыгы Ирек Садриев ачты. Ул ярышларда катнашучыларга авыр көндәлек хезмәтләре өчен рәхмәт белдерде, конкурсантларга лаеклы чыгыш ясауларын теләде. Быел мактау пьедесталында урын өчен көрәшергә районның 12 авыл хуҗалыгыннан үз эшләренең осталары җыелды. Иң кечкенәсе – Эльвира Нигъмәтуллинага - 32 яшь. Ул "Бакырчы" хуҗалыгында эшли. Үзе турында ул 11 яшьтән сыер савуын, ә әнисе – зур стажлы сыер савучы булуын сөйләде. Эльвираның ире механизатор булып эшли. Гаиләдә өч кыз – Самира, Зәринә һәм Ралина үсә. «Хуҗалыкта сыер бар, кызлары үзләре савалар, аларга ошый", - дип уртаклашты Тәтеш кызы. Ярыш теоретик әзерлек, саву аппаратларын сүтү һәм җыю, саву аппаратларын әзерләү, саву процессын әзерләү, санитар әзерлек, сөтнең чисталыгын бәяләүдән гыйбарәт иде.