Фәрһад Фәткуллин Википедиянең өстенлеген бер идеологиягә дә хезмәт итмәүдә күрә
(Казан, 4 декабрь, «Татар-информ», Айсылу Галиева). Википедия аерым бер идеология, дәүләт яки милләткә хезмәт итми. Татарча википедиянең китапханәчесе, тәрҗемәче Фәрһад Фәткуллин фикеренчә, порталның төп өстенлеге шунда.
Фәрһад фикеренчә, татар телле сайтлар никадәр күбрәк булса, шулкадәр яхшырак була. Әмма ул, әйтик, энциклопедик институт мәгълүматлары аерым сайтта түгел, Википедиядә урнаштырылса, күпкә отышлырак булыр иде, дип уйлый.
«Википедиядә башкача: син язасын да, бу материалны бөтен кеше күрә ала һәм ул Интернетта мәңгегә кала. Шулай ук син булдырган мәкаләне башка кешеләр дә үзгәртә ала. Син иҗтимагый файда эшлисең», — ди ул.
Яшьләр социаль челтәрдәге мәгълүматны кеше күрер дип уйлый, ди Фәрһад. Әмма Википедиянең өстенлеге бөтендөнья күләмендә булуында. Фәрһад әйтүенчә, чит илләрдә Википедия күпкә популяррак. Безнең илләрдән аермалы буларак, википедияче булу аларда күпкә югарырак бәяләнә, ди ул.
«Кызганыч, Татарстанда һәм Россиядә мондый эшчәнлек бик киң таралмаган», — диде ул.
Хәзерге вакытта татар телле Википедиягә гадәттә өлкәнрәк яшьтәге кешеләр яза.