“Алга” батальонының һәлак булган хәрбиләренең туганнарына Маргелов ордены тапшырдылар
Бүген «Ватанны саклаучылар» фондының Татарстан филиалында «Алга» батальонының һәлак булган сугышчыларын искә алдылар. Туганнарына «Армия генералы В.Ф.Маргелов» ордены тапшырылды. Бу орден «Россия десантчылары берлеге»нең хөкүмәтнеке булмаган иҗтимагый бүләге һәм десант гаскәрләре бүләгенең югары формасы булып тора. Бу турыда «Татар-информ» хәбәрчесе Дмитрий Шатров хәбәр итте.
2023 елның февралендә Татарстанның «Алга» штурм батальоны Угледар янында тозакка эләгә, анда безнең хәрбиләр батырларча һәлак була.
«Без авыр тарихи чорда яшибез. Берничә ел элек беркем дә сугыш безгә кагылыр дип уйламый иде. Бүген безгә, бабаларыбыз кебек үк, яшәү хокукыбызны якларга, балаларыбыз һәм үзебезнең киләчәкне якларга туры килә. Без Геройлар чорында яшибез. Бу – кыю йөрәкле батыр кешеләр заманы, алар безнең иминлек сагына басты. Без аларны көн саен истә тотарга тиеш. Безнең ил хәзер махсус хәрби операция зонасында булган көчле һәм батыр кешеләр алдында җаваплылык күрсәтә. Безнең фондның махсус хәрби операция ветераннарына һәм аларның гаиләләренә ярдәм итү өчен оештырылуы очраклы түгел. Без сезнең белән кайгыда да, шатлыклы минутларда да булачакбыз һәм проблемаларны хәл итүдә һәрвакыт ярдәм итәчәкбез», – дип сөйләде «Ватанны саклаучылар» фонды филиалы җитәкчесе Гүзәл Удачина.
Һәлак булган хәрбинең әтисе бүләкләү вакытында яңгыраган җырга игътибар итә.
«Беләсезме, хәзер «Журавли» җыры яңгырады. Бу җырны авар тамырлы рус кешесе язган, көен яһүд тамырлы рус кешесе язган, ә җырны барысы да җырлый. Бу җыр яңгыраганда, без егетләребезне искә төшерәбез. Бигрәк тә бу торналар безнең өстебездән очалар дигән сүзләр яңгыраганда, без бары тик өскә карыйбыз һәм аларны озатабыз. Без дә балаларыбызны шулай озатабыз», - диде ул.
Һәлак булган сугышчыларны искә алырга, шулай ук аларның туганнарына хөрмәт күрсәтергә «Алга» батальоны, Махсус хәрби операция ветераннары берлеге, Казан диңгез пехотасы ветераннары берлеге, Республика десантчылары берлеге вәкилләре, хәрби хәрәкәтләр ветераннары, Татарстан чик сакчылары берлеге әгъзалары һәм Россия Герое Дамир Исламов исемендәге хәйрия фонды вәкилләре килде.
«Мин һәлак булган егетләрнең мәетләрен кайтарыр өчен мөмкин булганның барысын да эшләячәкмен. Кайгыгызны уртаклашам, сезнең улларыгыз – барысы да Геройлар. Мәңгелек дан аларга», - диде «Алга» вәкиле.