Росстат апрель аенда татарстанлыларның хезмәт хакы 19 процентка артуы турында хәбәр итте
2024 елның апрелендә Татарстан оешмалары хезмәткәрләренең номиналь хезмәт хакы 70148 сум тәшкил итте, узган елның шул ук чоры белән чагыштырганда, ул 19,0 процентка артты. Бу Росстатның илнең социаль-икътисади хәле турында әзерләнгән докладында белдерелә.
Шул ук вакытта март белән чагыштырганда апрель аенда татарстанлыларның номиналь хезмәт хакы 3,4 процентка кимегән.
Росстат мәгълүматларына караганда, Татарстан оешмалары хезмәткәрләренең номиналь уртача айлык хезмәт хакы 2024 елның гыйнварыннан апреленә кадәр 2023 елның шул ук чоры белән чагыштырганда 20,1 процентка артып, 67458 сум булган.
Гомумән, Россиядә апрель аенда оешма хезмәткәрләренең уртача айлык хезмәт хакы 83875 сум иде. Узган елга караганда, ул 17,0 процентка арткан.
«Татар-информ» хәбәр иткәнчә, сораштыруда катнашкан россиялеләрнең өчтән бер өлеше соңгы өч айда хезмәт хакы артуы турында хәбәр иткән.