КФУның көнчыгышны өйрәнүче галиме Казанны халыкара сәясәт үзәкләренең берсе дип атады
Казан, БРИКС саммитын уздыру ярдәмендә, халыкара сәясәт үзәкләренең берсе булды. «Татар-информ»га мондый фикерне КФУ Халыкара мөнәсәбәтләр, тарих һәм көнчыгышны өйрәнү институтының Көнчыгышны һәм Исламны өйрәнү һәм африканистика кафедрасы доценты Азат Ахунов белдерде.
«Казан бөтен дөньяга танылды, дип әйтергә була. Бу глобаль Көньяк илләренә генә кагылмый, Көнбатыш матбугаты да бу вакыйганы актив яктыртты. Казан халыкара сәясәт үзәкләренең берсе булды. Саммитта кабул ителгән Казан декларациясе (ул очраклы гына рәвештә шулай аталмады), тарихта калачак», – диде Ахунов.
Аның сүзләренчә, БРИКС саммиты уздыру ярдәмендә Казанның халыкара әһәмияте ныгытылды
«Бу хакта БРИКС саммитына килгән илләр лидерлары да әйтте», - дип өстәде эксперт.