Էրդողանին շնորհակալ եմ ամեն ինչի համար, բայց նա պետք է իմանա՝ միայն Թուրքիան որպես միջնորդ մեզ բավարար չէ. Զելենսկի
Միայն Թուրքիան բավարար չէ Ուկրաինայի և Ռուսաստանի միջև միջնորդ հանդես գալու համար, հայտարարել է Ուկրաինայի նախագահ Վլադիմիր Զելենսկին: Այս մասին գրում է interfax.com.ua-ն:
«Նրանք (Թուրքիան) ցանկանում են լինել միջնորդ: Եվ նախագահ Էրդողանը գիտի, որ ես շնորհակալ եմ իրեն ամեն ինչի համար, բայց նա պետք է իմանա՝ միայն Թուրքիան որպես միջնորդ մեզ բավարար չէ: Մեզ համար Խաղաղության գագաթնաժողովի ձևաչափը լավագույնն է»,- ասել է նա։
«Մեր թուրք գործընկերների հզորության նկատմամբ ողջ հարգանքով հանդերձ՝ նրանք շատ բան են արել մեզ համար... Բայց նրանք նաև ամուր հարաբերություններ ունեն Ռուսաստանի հետ։ Նրանք նույնպես ունեն իրենց շահերը՝ տնտեսական։ Եվ հետևաբար, ես կարծում եմ, որ միայն Թուրքիան բավական չէ»,- նշել է Զելենսկին։
Ըստ Ուկրաինայի նախագահի՝ այն ձևաչափը, որը իրենք այսօր ծրագրում են՝ գագաթնաժողովի ձևաչափը, «շատ բարդ է, որովհետև պետք է համախմբեն շատ երկրներ»:
«Յուրաքանչյուրն ունի իր շահերը, պատմական, ժամանակակից հարաբերություններ Ռուսաստանի հետ, տնտեսական հարաբերություններ՝ մեզ հետ, Եվրոպայի հետ՝ այլ հարաբերություններ: Իմ կարծիքով՝ երկրների մեծ թիվն է, որ կկարողանա գոնե փորձել Ռուսաստանին հարկադրել արդար խաղաղության գնալ»,- ասել է Զելենսկին։