Var nesten ute, men vann likevel
Casper Ruud var i ferd med å tape, men er klar for finale i turneringa i Buenos Aires etter ein imponerande snuoperasjon. Han slo Juan Ignacio Londero 4-6, 7-5, 6-1.
Men Ruud sleit innleiingsvis. Etter tap i første sett, låg han under 5-4 i det andre.
Så braut han og vann settet. I det tredje var han klart best, og er klar for sin andre ATP-finale.
I finalen søndag møter han useeda Pedro Sousa frå Portugal.
Prognosane seier at han er på 38.-plass på verdsrankinga. Dermed har han slått pappa Christian, som på sitt beste var nummer 39. Ny offisiell rangering kjem måndag.
Casper Ruud kan også bli den første nordmann som vinn ei ATP-turnering.
Ruud fekk også applaus frå heimepublikummet då han braut av kampen for å hente vassflaske til ein tilskodar som kollapsa i den sterke varmen.