Rørt Dahlen tok seg til semifinale

Aida Husic Dahlen er klar for semifinale i Paralympics etter siger 3-1 over ungarske Zsofia Arloy i kvartfinalen. Det betyr at ho er sikra medalje, ettersom det ikkje blir spela bronsefinale.

Den norske 30-åringen har to femteplassar som best i Paralympics tidlegare, og difor blei det ekstra emosjonelt då Dahlen klarte å sikre semifinalebilletten etter fjerde sett.

Dahlen vann eit jamnt første sett med 14-12, og var klart best i det andre med 11-6.

I det tredje låg ho under med 4-7, snudde til 9-8, men tapte 9-11.

Men i det fjerde var det ingen tvil. Dahlen vann 11-5.

I semifinalen laurdag klokka 04.00 skal Dahlen møte kinesiske Jingdian Mao.