"Насаф" клуби 10 йиллик танаффусдан кейин яна ОФК кубоги финалига чиқди. Ярим финалда Гонг Конгнинг "Ли Ман" жамоаси қаршилигини синдирган "аждарлар" Баҳраин шарафини ҳимоя қилаётган "Ал-Муҳаррақ" клуби билан бош соврин учун кураш олиб боради. Мазкур баҳс олдидан "Насаф" легионери Андрия Калудерович ОФК расмий сайтига интервью бериб ўтди: "10 йилдан сўнг яна финалдамиз ва ОФК кубогини ютиб, ўзбекистонлик мухлисларни хурсанд қилиш учун қўлимиздан келган барча ишни қиламиз!", - деди сербиялик футболчи. Маълумот учун, финал 5 ноябрь куни Баҳрайннинг Арад шаҳридаги "Ал-Муҳаррақ" номли стадионда бўлиб ўтади.
