Тошкентдаги Renaissance Hall залида Ўзбекистон футбол ассоциациясининг навбатдан ташқари Конгресси бўлиб ўтмоқда. Конгрессда Одил Аҳмедов ЎФА вице-президенти ҳамда ЎФА Ижроия қўмитасининг аъзолигига сайланди. Шунингдек, йиғилишда Рустам Шоабдураҳмонов, Аваз Каримов, Меҳриддин Абдуллаев, Козимжон Комилов, Алишер Хўжаев ЎФА Ижроқўм аъзолигига сайланди. Аввалроқ Аҳмедов футболчилик фаолиятини якунлаганини эълон қилганди. Одил футболчилик фаолиятида Хитойнинг «Цанчжоу Майти Лайонс» клуби сафида тўп суриб келаётганди. Унгача эса «Пахтакор» (2006—2011), «Анжи» (2011—2014), «Краснодар» (2014—2016), «Шанхай СИПГ» (2017—2021) каби жамоаларда тўп сурган. Аҳмедов 2022 йилда Қатарда бўлиб ўтадиган Жаҳон Чемпионатига чиқа олмаганидан кейин 2021 йилнинг 19 июнь санасида терма жамоадаги фаолияти якунланаётганини эълон қилганди. Аҳмедов Ўзбекистон миллий терма жамоасидаги дебют ўйинини 2007 йил 13 октябрда Хитой Тайпейига қарши (9:0) ўтказган. 34 ёшли футболчи мамлакат бош жамоаси сафида 108 ўйинда майдонга тушиб, 20 та голга муаллифлик қилган.
