Яқинда "Блогбастер" "Youtube" канали аъзолари Қаршида бўлиб, футболчи Иван Соловьев билан интервью уюштирди. Суҳбат чоғида журналист “Насаф” бош директори Алишер Юсуповни ҳам саволга тутди. —“Насаф”нинг молиявий ҳолати ҳақида гапириб берсангиз. Клубнинг бюджети қанча? —Бош ҳомийимиз “Шўртан газ-кимё” мажмуаси ҳисобланади. Йил бошида биз сметани тасдиқлаймиз. Бюджетимиз йилига тахминан 25 миллиард сўмни ташкил қилади. —Клубингиз Суперлигада бюджет борасида нечанчи ўринда? —“Насаф” Ўзбекистон чемпионатида бюджет борасида кучли тўртликдан жой олган. —Юқоридаги ўринларни қайси жамоалар банд этган? —Пойтахнинг “Пахтакор” клуби Ўзбекистон чемпионатидаги энг бадавлат жамоа ҳисобланади. Менимча, уларнинг бюджети бизникидан каттароқ. Аммо аниқ миқдори қанча эканлигини билмайман. Қолаверса, АГМК, “Металлург” ва “Навбаҳор” каби жамоалар ҳам “Насаф”дан юқорироқ ўринларда туради. —Клубингиздаги футболчиларнинг ўртача маоши қанча? —Клубимизда унчалик катта маош берилмайди. Ўртача минг доллардан 6 минг долларгача иш ҳақи берилиши мумкин. —Легионерлар кўпроқ оладими? —Бу табиий ҳолат. Сабаби, легионерлар маҳаллий футболчилардан бир бош баланд бўлиши керак. —Ғалаба учун футболчилар қанча мукофот пули олади? 1000 доллардан – 5000 долларгача? —Тахминан 1000 доллар атрофида мукофот пули берилиши мумкин. —Жамоа чемпионатда ғолиблик учун қанча олади? —Биринчи ўрин учун тахминан 100 минг доллар пул берилиши мумкин. —Ушбу суммадан қанчаси футболчиларга берилади? —Айтиш қийин. Бу кўпроқ футболчиларнинг сонига боғлиқ. Мисол учун, аввал таркибимизда 35 нафар футболчи бор эди. Ҳозир эса 37 нафар. Табиийки, бу миқдорга ўз таъсирини ўтказади.
