Шомуродов “Кальяри”дан кетмоқчи. Элдор янги жамоа танлаб бўлди
28 ёшли форварднинг ўзи декабрда олган жароҳатидан қутилишга жуда яқин турибди. Элдор машғулотда ўнг оёқ бармоғини синдириб олиб, тезроқ тузалиш учун операция қилинган эди.
Шомуродовнинг ўзи операциядан кейин тезроқ сафга қайтиб Ўзбекистон миллий терма жамоаси сафида Қатардаги Осиё кубогида иштирок этишни режалаштирган бўлса-да, шифокорлар бу турдаги жароҳатдан тикланиш икки ой атрофида вақт олишини ва ўзбек ҳужумчиси февраль ойи бошида сафга қайтишини маълум қилган эди.
Шу билан бирга Элдор Шомуродов фаолиятини қаерда давом эттириш масаласини ҳам ҳал қилиш керак. Ҳамюртимиз жароҳат олганидан кейин “Кальяри” уни муддатидан олдин “Рома”га қайтариш ҳаракатига тушиб қолганди.
Бир неча манбалар, хусусан, La Nuova Sardegna, Sky Sport, tuttomercatoweb.com, cagliarinews24.com каби газета ва сайтлар Сардиния клуби спорт директори Бонато ўзбек легионеридан қутилмоқчи экани ҳақида маълумот тарқатмоқда.
Қолаверса, бир неча манбалар Элдор Шомуродовга А Сериянинг ўзидан вариантлар чиқаётгани ёзди. Хусусан, euro-football.ru сайти ўз манбалари орқали Элдор Шомуродов атрофидаги вазиятга ойдинлик киритди.
- “Кальяри” ҳужумчиси Элдор Шомуродов тез орада Италиянинг А Сериясидаги бошқа жамоада пайдо бўлиши кутилмоқда. Ҳозирги клуби ўзбек футболчисини “Рома”дан ижарага олган.
Ҳужумчининг ўзи ўйин амалиёти камлигидан норози ва клубини ўзгартирмоқчи. Манбаларимизнинг эксклюзив маълумотига кўра, айни пайтда 28 ёшли Шомуродовга “Салернитана”, “Эмполи” ва 2020 йили ўзи кўчиб ўтган Италиядаги биринчи жамоаси – “Женоа”дан қизиқиш бўлмоқда.
Шунингдек, Туркиянинг номи сир тутилаётган бир неча клублари ҳам ҳужумчининг хизматларига қизиқяпти.
Манбаларга кўра, Шомуродовнинг ўзи ва атрофидагилар “Салернитана” вариантини маъқул кўрмоқда. Бу жамоа А Серияда 20-поғонани эгаллаб турибди ва Элдор бу жамоада мунтазам равишда ўйин амалиётига эга бўлади, - деб ёзмоқда euro-football.ru сайти.
Элдор Шомуродов А Сериядаги фаолияти давомида “Женоа”, “Рома” ва “Специя” каби жамоалар шарафини ҳимоя қилиб, уларнинг барида ўз номига гол ёздириб қўйишни уддалаган. “Кальяри”да эса, мавсумнинг биринчи қичмида А Серия ва Италия кубогида жами 13 та учрашувда қатнашиб, атиги иккита ассист қайд этди. Аксарият ҳолларда тажрибали ҳужумчи захирадан майдонга туширилмоқда.
Италияда қишки трансферлар бозори 1 февраль куни кечқурун ёпилади.