Криштиану таклифи билан Жезуш қайтди: "Ал-Наср"да янги саҳифа
Эслатиб ўтамиз, жорий йилнинг бошларида "Ал-Наср" италиялик мураббий Стефано Пиоли билан йўлларни ажратганди. Мазкур қарордан сўнг жамоага янги етакчи излана бошланди ва ниҳоят, клуб ўз танловини маълум қилди — энди руль Жезуш қўлида.
Жорже Жезуш сўнгги бор "Ал Ҳилол" клубида фаолият юритган эди. Унинг бошқарувида мазкур жамоа Саудия Арабистони чемпионатида иккинчи ўринни қўлга киритган. Қизиғи шундаки, "Ал-Наср" эса ушбу мусобақани учинчи поғонада якунлаганди.
Жезушнинг қайтиши бир неча сабаблар билан боғлиқ. Аввало, у Саудия Арабистони футболи муҳитини яхши билади, иккинчидан, у ердаги шароит, фанатлар ва чемпионат руҳига беғам эмас. Аммо асосий сабаб бошқа: уни таклиф қилган шахс Криштиану Роналдунинг ўзи бўлган.
“Мен Саудия Арабистонини яхши кўраман, бу мамлакат нафақат футбол, балки келажак учун ҳам муҳим. Қайтиб келганимдан жуда мамнунман”, – деди Жезуш тақдимот чоғида.
Мутахассис ўз сўзларида Роналдуга алоҳида эътибор қаратиб, унинг таклифига рад жавоби беришнинг имконсизлигини таъкидлади:
“Криштиану – қаерда ўйнаса, у ерда ғалаба келтирган футболчи. Фақат Саудия Арабистони қолган эди. Кўрамиз, бу гал унга ғалаба йўлида ёрдам бера оламанми. Биз бир тилда гаплашамиз, бу катта устунлик”.
Футбол мухлислари учун бу янгилик шубҳасиз қизиқарли. Чунки Жезуш ва Роналду иккиси ҳам португал футболининг шарафини ҳимоя қилган, футбол майдонида ўз сўзини айтган шахслар. Энди эса улар бир жамоа сафида умумий мақсад – чемпионлик учун ҳаракат қилишади.
"Ал-Наср"даги бу янги босқичнинг қандай кечиши, жамоа янги бош мураббий билан қандай натижаларга эришиши ҳозирча номаълум. Бироқ бир нарса аниқ – португал дуэтидан ҳам мухлислар, ҳам футбол экспертлари катта умидда.