Роналду ва Месси рақобати яна авжида: ким устунлик қилмоқда?
Футбол олами яна икки буюк юлдуз — Криштиану Роналду ва Лионель Месси номларини муҳокама қилмоқда. Бу икки афсонанинг ўзаро рақобати орқали бутун бир давр таърифланди десак, муболаға бўлмайди. Улар фаолиятларининг сўнгги йилларига қадам қўйган бўлсалар-да, ҳануз жаҳон футболи саҳнасининг марказида туришибди, деб хабар берди ESPN.
Саудия Арабистонидаги Про-лига доирасида “Ал-Наср” клуби “Ал-Фейҳа”га қарши баҳсда 2:1 ҳисобида ғалаба қозонди. Жамоа сардори ва етакчиси Криштиану Роналду яна ўз сўзини айтди — у дубль қайд этиб, риёдликларга муҳим уч очко тақдим этди. Шу билан португалиялик ҳужумчининг фаолияти давомида урган умумий голлари сони 952 тага етди. Бу рақам футбол тарихида мисли кўрилмаган даража ҳисобланади.
40 ёшда бўлишига қарамасдан, Роналду ҳануз юқори формада. Унинг майдондаги ҳаракатлари, ҳаракатчанлиги ва эҳтироси ёш футболчиларга намуна бўлиб келмоқда. Ҳар бир голидан кейинги ҳиссиёт, ҳар бир ғалабадаги хурсандчилиги — унинг футболга бўлган муҳаббати ҳали ҳам кучли эканлигини кўрсатади.
Бу пайтда океан ортида — АҚШда Лионель Месси бошчилигидаги “Интер Майами” жамоаси МЛС плей-офф босқичида омадсиз иштирок этди. Майамиликлар “Нэшвилл” жамоасига 1:2 ҳисобида мағлуб бўлди. Мессининг жамоа манфаати учун урган гўзал голи натижани ўзгартиришга етарли бўлмади.
Шу билан аргентиналик юлдузнинг шахсий статистикасидаги голлар сони 892 тага етди. Энди “Интер Майами”нинг кейинги босқичга чиқиш тақдири 8 ноябрда бўладиган ҳал қилувчи учинчи учрашувда маълум бўлади.
Голлар сони бўйича ҳозирча устунлик Роналдуда бўлса, ассистлар жиҳатидан Месси етакчиликни қўлдан бермаяпти. Саккиз карра “Олтин тўп” соҳиби бўлган аргентиналик ҳужумчи фаолияти давомида жамоадошларига 399 та самарали пас узатган. Бу кўрсаткич уни дунё футболидаги энг меҳнаткаш ва жамоавий ўйинчи сифатида танитишга етарли. Роналдуда эса 259 та голли узатма мавжуд.
Икки юлдузнинг рақобати фақат статистика билан чегараланмайди — бу икки шахс футбол фалсафаси, меҳнат маданияти ва замонавий спортнинг рамзига айланган. Улар майдонда турли услубда ўйнаса-да, ҳар иккаласи ҳам футболнинг маънавий юзига айланди.
Ҳозир ҳам дунёдаги миллионлаб мухлислар ҳар бир ўйиндан кейин “ким яхшироқ?” деган саволга жавоб излашда давом этмоқда. Аммо аниқ бир жиҳат бор — Роналду ва Месси рақобати бутун бир авлодни илҳомлантирган, футбол тарихига абадий битилган воқеликдир.
Бу рақобат энди фақат майдонда эмас, балки тарих саҳифаларида ҳам давом этмоқда. Роналдунинг 952 голи ва Мессининг 892 голи — икки афсонанинг ўчмас изидир.