АПЛда гигант баҳолар яна ўзгарди, Ҳоланд тарихий чўққини забт этди
Англия Премьер-лигасида яна бир катта янгиланиш эълон қилинди — Transfermarkt маълумотларига кўра, чемпионатда иштирок этаётган 543 нафар футболчининг бозор қиймати қайта ҳисоблаб чиқилди. Умумий қиймат 237,1 миллион еврога пасайганига қарамай, АПЛ 12,53 миллиард евро билан дунёнинг энг қиммат ва энг нуфузли чемпионати сифатида ўз позициясини мустаҳкам сақлаб турибди.
Бу сафарги рейтингда айниқса икки футболчи эътибор марказида бўлди. «Манчестер Сити»нинг жойида тўхтамайдиган гол машинаси — Эрлинг Ҳоланд бозор қийматини яна 20 миллион еврога ошириб, 200 миллион евро кўрсаткичига етди ва дунёдаги энг қиммат футболчи мақомини мустаҳкамлади. Энди у мазкур рўйхат «тепаси»ни «Барселона»нинг ёш суперюлдузи Ламин Ямал билан баҳам кўради.
«Челси»нинг бразилиялик ёш иқтидори Эстевао ҳам ўз нархини жиддий кўтариб, лондонликлар учун яна бир қувончли янгилик яратди. Умуман олганда, жамоавий қиймат бўйича ҳам энг катта ўсиш айнан «Челси»да кузатилди.
Шунингдек, ушбу янгиланиш мавсумни мураккаб ўтказаётган «Ливерпул» учун унчалик хушхабар бўлмади — бир қатор футболчиларнинг қиймати сезиларли равишда пасайди.
Янгиланган рўйхатга кўра АПЛнинг энг қиммат 10 футболчиси қуйидагича:
-
Эрлинг Ҳоланд — 200 млн евро
-
Букайо Сака — 130 млн евро
-
Коул Палмер — 120 млн евро
-
Деклан Райс — 120 млн евро
-
Александр Исак — 120 млн евро
-
Флориан Вирц — 110 млн евро
-
Мойсес Кайседо — 110 млн евро
-
Райан Гравенберх — 90 млн евро
-
Уильям Салиба — 90 млн евро
-
Ҳюго Экитике — 85 млн евро
Қизиғи шундаки, Ҳоланд ва Сака ўртасидаги 70 миллион еврога тенг тафовут лига тарихидаги энг йирик фарқ сифатида қайд этилди.
Премьер-лигадаги рақобат шунчалик кучлики, бозор қийматларининг бундай кескин ўзгариши ҳам мухлислар ўртасида катта муҳокамага сабаб бўлмоқда. Лигадаги ёш иқтидорлар, тажрибали юлдузлар ва тактик ўзгаришлар ҳар бир жамоанинг активлари динамикасига беқиёс таъсир кўрсатмоқда.