Испания кубогида сенсациялар: «Реал» қутилди, фаворитлар эса йиқилди (видео)

Испания Кубогининг 1/16 финал босқичи кутилмаган натижаларга бой бўлди. Бир қатор учрашувларда сенсацион ҳисоблар қайд этилди, айрим фаворит жамоалар эса турнир билан хайрлашишга мажбур бўлди.

Мадриднинг «Реал» клуби тўртинчи дивизион вакили «Талавера»га қарши ўйинда жиддий қаршиликка дуч келди. Учрашувда «қаймоқранглилар» икки бор ўз дарвозасидан тўп олиб чиқди. Аммо Килиан Мбаппенинг дубли ва рақиб ҳимоячисининг автоголи Алонсо жамоасини навбатдаги босқичга олиб чиқди. Франциялик юлдуз ўйин тақдирини ҳал қилган футболчига айланди.

Талавера — Реал 2:3
Голлар: Арройо (80), Наварро (90+1) — Мбаппе (41, 88), Фаррандо (45+1, автогол).
Реал — Лунин, Хименес, Ҳейсен, Каррерас, Фран Гарсия, Мастантуоно (Родриго, 66), Себалос (Сестеро, 86), Гулер (Чуамени, 77), Эндрик (Беллингҳем, 77), Мбаппе, Гонсало Гарсия.

Шу билан бирга, Испания элитасининг бир қатор клублари мусобақани эрта тарк этди. «Севиля» «Алавес»га минимал ҳисобда мағлуб бўлди. «Селта» эса «Албасете» билан драматик баҳсда асосий вақтни дуранг билан якунлаб, пеналтилар сериясида мағлубиятга учради. «Леванте» ҳам «Културал Леонеса» тўсиғидан ўта олмади.

Алавес — Севиля 1:0
Гол: Висенте (79, пеналти).

Албасете — Селта 2:2
Голлар: Ҳефте (18), Валехо (90+3) — Лаго (64), Иглесиас (75).
Пеналтилар серияси — 3:0.

Културал Леонеса — Леванте 1:0
Гол: Тресако (12).

Қолган баҳсларда «Осасуна» қўшимча дақиқаларда «Уэска»ни мағлуб этиб, характер кўрсатди ва кейинги босқичга чиқди.

Уэска — Осасуна 2:4
Голлар: Луна (35), Кортахарена (105+1) — Де Аро (45+1, 95), Осамбела (111), Будимир (118).

Шу тариқа, Испания Кубогининг навбатдаги босқичида кутилмаган жамоалар ва ҳақиқий драмалар пайдо бўлди. Мусобақа тобора қизиб бормоқда ва мухлисларни олдинда яна катта интригалар кутиб турибди.