Белоус ЖЧ-2026да 48 жамоа иштирокини танқид қилди

Москванинг «Локомотив» клуби собиқ вице-президенти Юрий Белоус 2026 йилги футбол бўйича Жаҳон чемпионати финал босқичида 48 терма жамоа қатнашиши масаласига муносабат билдирди. У бу ҳақдаги фикрларини «Евро-Футбол.Ру» нашрига берган интервьюсида айтиб ўтди.

Белоуснинг таъкидлашича, мухлислар бу қарорни қўллаб-қувватлайдими ёки йўқми, энди бунинг аҳамияти йўқ, чунки қарор аллақачон қабул қилинган. «Гап шундаки, Инфантино УЕФА ФИФАга қараганда кўпроқ даромад олаётганидан тинчимайди.

Шу боис кенгайтириш кўпроқ мамлакатларнинг иштирокига олиб келади. Ягона ижобий томони — футболнинг оммалашуви.

Авваллари Жаҳон чемпионатига чиқишни ҳатто орзу ҳам қилмаган кўплаб давлатлар энди йўлланма олди», — деди у. Шунингдек, Белоус Ўзбекистон миллий терма жамоасини табриклади: «Бу жамоа жуда катта ўсишга эришди.

Менимча, улар Жаҳон чемпионатида “ютқазиш учун келган жамоа” бўлиб қолмайди», — дея қўшимча қилди эксперт. Эслатиб ўтамиз, 2026 йилги Жаҳон чемпионати финал босқичида 48 терма жамоа иштирок этади.

2022 йилда Қатарда ўтган турнирда эса гуруҳ босқичида 32 жамоа қатнашган эди.