Ўзбек ҳакамлари U-23 Осиё кубогида иштирок этади
2026 йилнинг 6–24 январ кунлари Саудия Арабистонида 23 ёшгача бўлган футболчилар ўртасида Осиё кубогининг финал босқичи бўлиб ўтади. Қитъанинг энг кучли ёшлар жамоалари жам бўладиган ушбу нуфузли мусобақада Ўзбекистон футбол ҳакамлик мактаби вакиллари ҳам муносиб иштирок этади.
Маълумотларга кўра, турнирга ўзбекистонлик ҳакамлар жамоаси ва инспекторлар расман жалб қилинган. Бу эса мамлакатимиз ҳакамларига Осиё миқёсида ишонч ортиб бораётганидан далолат беради.
Финал босқичида учрашувларни бош ҳакам сифатида Аскер Нажафалиев бошқаради. Унинг қанотлардаги ишончли ёрдамчилари сифатида Руслан Серазетдинов ва Бахтиёрхўжа Шавкатов фаолият юритади. Замонавий футболда муҳим аҳамият касб этаётган ВАР тизимида эса Фирдавс Норсафаров ҳакам сифатида иш олиб боради.
Шунингдек, Валентин Коваленко турнирда инспектор сифатида қатнашиб, ҳакамлик жараёнлари ва қарорларини баҳолаш билан шуғулланади. Бу каби масъулиятли вазифаларга тайинланиш ўзбекистонлик мутахассисларнинг тажрибаси ва салоҳиятига берилган юқори баҳодир.
Қайд этиш жоизки, U-23 Осиё кубоги нафақат ёш футболчилар учун, балки ҳакамлар учун ҳам катта синов ва тажриба майдони ҳисобланади. Мазкур мусобақада муваффақиятли иш олиб бориш келгусида янада йирик халқаро турнирларга йўл очиши мумкин.
Ўзбек ҳакамларининг Саудия Арабистонидаги нуфузли мусобақада иштирок этиши миллий футболимиз обрўси ошиб бораётганининг яна бир яққол исботи бўлди. Мухлислар эса уларнинг адолатли ва ишончли фаолиятига ишонади.