Мбаппенинг Роналду услубида гол нишонлаши Мадрид мухлисларини лол қолдирди
Мадриднинг "Реал" жамоаси "Севилья"га қарши ўтказган баҳсда навбатдаги ишончли ғалабани қўлга киритар экан, учрашув қаҳрамонларидан бири Килиан Мбаппе бўлди. Франциялик юлдуз жамоасининг иккинчи голини уриб, уни афсонавий Криштиану Роналдуга хос нишонлаш услубида нишонлади.
Бу гол Мбаппе учун алоҳида аҳамиятга эга бўлди. Чунки у 2025 йил давомида урган 59-голи орқали Криштиану Роналдунинг 2013 йилда “Реал” сафида қайд этган тарихий натижасини такрорлади. Шу тариқа, Килиан ўз номини клуб тарихидаги энг самарали футболчилар қаторига яна бир бор ёзиб қўйди.
Учрашувдан сўнг Мбаппе ушбу гол ва унинг нишонланиши ҳақида самимий фикрлар билдирди. Унинг айтишича, Роналду нафақат дўсти, балки болаликдан кумири ҳисобланади.
«Криштиану — мен учун жуда яқин инсон ва футболдаги илҳом манбаим. Бу голни айнан унга бағишладим. У “Реал”га мослашишимда менга катта ёрдам берган. Шу орқали унга миннатдорлигимни билдирмоқчи бўлдим ва Янги йил билан табриклайман», — деди Мбаппе.
Франциялик ҳужумчи одатда ўзига хос нишонлаш услубига эга эканини таъкидлар экан, бу гал атайлаб Роналдунинг машҳур ҳаракатини такрорлашни истаганини ҳам қўшимча қилди.
Мадрид мухлислари учун эса бу гол шунчаки статистик натижа эмас, балки авлодлар давомийлигини, афсоналар изидан келаётган янги юлдузни яққол намоён этган лаҳза сифатида ёдда қолди.