Рафаэл Леау жароҳатдан сўнг умумий машғулотларга қайтди
Португалиялик ҳужумчи Рафаэл Леау навбатдаги мушак чўзилиши сабаб тикланиши кутилганидан секинроқ кечгани учун «Верона»га қарши ўйинни ўтказиб юборганди. Шунга қарамай, «Милан» унинг иштирокисиз ҳам рақибини ишончли тарзда мағлуб этиб, вероналикларга жавобсиз учта гол урди. Бу ҳақда euro-football.ru хабар беради.
Энди эса «россонери»нинг навбатдаги учрашувида Леау майдонга қайтиши эҳтимоли юқори. Гап 2-январ куни «Кальяри»га қарши бўладиган ўйин ҳақида кетмоқда. Бугун португалиялик форвард жамоа билан умумий гуруҳда машғулот ўтказди — бу одатда футболчининг тез орада расмий учрашувларда сафга қайтишидан дарак беради.
Айни пайтда «Милан» А Серия турнир жадвалида иккинчи ўринда бормоқда.