Мусиола «Бавария»да қолишини айтди ва бошқа йўл изламади
Мюнхеннинг «Бавария» клуби ҳужумкор ярим ҳимоячиси Жамал Мусиола янги шартнома имзолаш қарори ҳақида фикр билдирди. Бу ҳақда euro-football.ru хабар беради.
Томонлар 2025 йил февраль ойида беш йиллик келишувга қўл қўйган, унга кўра футболчи 2030 йилгача клубда қолади.
«Мен учун “Бавария” — оила. Шу сабабли шартномани 2030 йилгача узайтирдим. Карьерамнинг келгуси йилларини айнан шу ерда ўтказмоқчиман. Бошқа вариантларни умуман кўриб чиқмадим», — дея 22 ёшли футболчининг сўзларини немис ОАВга таяниб «Gazeta.Ru» келтирди.
Мусиола эса ҳануз ўтган йил июлида олган болдир суяги синишидан тикланишда давом этмоқда. Мюнхенликлар юлдузининг майдонга аниқ қачон қайтиши ҳозирча номаълум.