Шустер «Бавария» футболчисининг орзусини очиқ айтганини олқишлади
Германия терма жамоасининг собиқ футболчиси Бернд Шустер «Бавария» ярим ҳимоячиси Леннарт Карлнинг келажакда Мадриднинг «Реал»ига ўтишни исташи ҳақидаги баёнотига муносабат билдирди. Бу ҳақда euro-football.ru хабар беради.
Шустернинг фикрича, ёш футболчининг бундай очиқ-ошкоралиги ҳурматга лойиқ. У катта мақсадларни кўзлаш футболчи камолотининг табиий қисми эканини таъкидлади.
«Буни очиқ айтгани жуда яхши. Инсон доим ўз орзуси ортидан бориши керак. Бу жаҳон футболининг энг юқори чўққисига чиқишга интилаётганини кўрсатади», — дея Шустер сўзларини келтиради Bild.
Эслатиб ўтамиз, Карлнинг ушбу гапларидан сўнг у танқидлар тўлқинига учради. Айрим мухлислар ижтимоий тармоқларда футболчини Мюнхен жамоаси таркибидан чиқариб ташлашни ҳам талаб қилди.