Малайзияда велоспортчиларимиз шоу қилди: учта олтин ва битта бронза
Малайзиянинг Нилай шаҳрида велотрек бўйича “Asean track series” мусобақасининг 1-босқичи якунланди. Унда қатнашган Ўзбекистон терма жамоаси жуда муносиб натижа қайд этиб, умумий ҳисобда 3 та олтин ва 1 та бронза медалини жамғара олди.
Бу босқичнинг ҳақиқий қаҳрамони Сергей Ростовцев бўлди. У бир мусобақада уч хил йўналишда ҳам рақибларини ортда қолдириб, олтин медаллар “коллекция”сини тўлдирди. Ростовцев омниум, скретч ва элиминейшн баҳсларида ғолибликни ўз ҳисобига ёздирди.
Қувонарлиси, қизларимиз ҳам медал билан қайтди. Нафосат Козиева элиминейшн дастурида кучли рақобат орасида бронза медалини қўлга киритиб, терма жамоа ҳисобини янада бойитди.
Медаллар рўйхати:
Олтин медаллар:
— Сергей Ростовцев (омниум)
— Сергей Ростовцев (скретч)
— Сергей Ростовцев (элиминейшн)
Бронза медал:
— Нафосат Козиева (элиминейшн)
Энди ҳамюртларимиз шу шаҳарнинг ўзида 10–11 январь кунлари ўтказиладиган 2-босқичда ҳам ўз омадини синаб кўради. МОҚ хабар беришича, жамоа яхши руҳиятда ва навбатдаги стартларга тайёргарликни давом эттирмоқда.
Қисқаси, Нилайдаги биринчи босқич “бизникилар” учун кайфиятли бошланди. Энди иккинчи босқичда ҳам шундай темп кетса — медаллар яна кўпаяди.