"Тоттенхэм"да шов-шув: Франк кетиши мумкин, Почеттино қайтишига умид
Англия Премьер-лигасининг 22-турида “Тоттенхэм” ўз майдонида лига аутсайдерларидан саналган “Вест Хэм”га 1:2 ҳисобида мағлуб бўлди. Лондон дербисидаги бу кутилмаган йўқотиш “шпорлар” учун фақат 3 очко эмас, балки жамоа атрофидаги вазиятни янада кескинлаштириб юборган тўлқин бўлди.
Мағлубиятдан кейин клуб бош мураббийи Томас Франкнинг келажаги ҳақида гап-сўзлар кўпайди. Даниялик мутахассисга бўлган босим тобора оғирлашмоқда: бир қатор манбаларга кўра, у яқин кунлардаёқ ишдан бўшатилиши мумкин. Яъни, “Тоттенхэм”да ҳозир голлардан кўра гаплар тезроқ юряпти, десак ҳам муболаға бўлмайди.
Франкнинг ўзи эса “Вест Хэм”га қарши ўйиндан кейин мухлислар қарсак ўрнига эътироз билдирганига қарамасдан, раҳбарият уни қўллаб-қувватлашига ишонади. Бироқ сўнгги ҳафталарда клуб ичидаги кайфият ўзгариб бораётгани айтилмоқда. Раҳбарият мураббийлар штабида ўзгаришлар керакми-йўқми, деган саволни жиддий кўриб чиқмоқда.
Шарт оддий, лекин қаттиқ: агар “Тоттенхэм” яқин учрашувларда ижобий натижаларни қўлга кирита олмаса, Франк билан хайрлашиш варианти реал сценарийга айланади. Шу билан бирга, клуб раҳбарияти эҳтимолий номзодлар рўйхатини ҳам шакллантириб улгургани таъкидланяпти.
Хабарларга кўра, янги мураббийлар қаторида “Борнмут”дан Андони Ираола ва “Кристал Пэлас”дан Оливер Гласнер номлари тилга олинмоқда. Бироқ асосий, энг катта қизиқиш уйғотаётган вариант — Маурисио Почеттино. Аргентиналик мутахассис “Тоттенхэм”да илгари катта ютуқларга яқин келган, клуб муҳитига таниш, мухлислар эса уни қайтишига алоҳида умид боғлаётгани сир эмас.
Лекин бу ерда муҳим “аммо” бор: Почеттинонинг қайта келиши фақат 2026 йилги жаҳон чемпионатидан кейин амалга ошиши мумкин. Сабаби — у ҳозир АҚШ терма жамоасини бошқармоқда. Демак, “Тоттенхэм” учун бу вариант тезкор ечим эмас, кўпроқ узоқроқ режа сифатида кўриляпти.
Эслатиб ўтамиз, Почеттино 2019 йилда беш йиллик фаолиятдан кейин “Тоттенхэм”ни тарк этган ва ўша даврда жамоа Чемпионлар лигаси финалигача етиб борган эди. Кейин у ПСЖ ва “Челси”ни ҳам бошқарди, ҳозир эса АҚШ билан янги лойиҳа устида ишламоқда.
Статистика ҳам унинг “шпорлар”даги изини кўрсатиб турибди: Почеттино қўл остида “Тоттенхэм” 293 та ўйин ўтказиб, 160 тасида ғалаба қозонган, 2016 йилда эса Премьер-лига чемпионлигига жуда яқин келган.
Ҳозирги манзара эса шундан далолат берадики: “Тоттенхэм” олдиндаги ўйинларда фақат майдонда эмас, клуб ичидаги қарорлар фронтида ҳам имтиҳон топширади. Франк учун бу — натижа билан жавоб бериш вақти. Мухлислар эса оддий: гап эмас, амал керак.