Фабрегаснинг «Комо»си Римда «Лацио»ни нақд "ерга урди"...
Италия чемпионатида 21-турнинг пардаси ёпилар экан, энг сўнгги баҳс Римда ўтди. «Лацио» ўз майдонида «Комо»ни қабул қилди, аммо учрашув мезбонлар учун эмас — Сеск Фабрегас шогирдлари учун байрамга айланди. Меҳмонлар рақибни мутлақ устунлик билан 3:0 ҳисобида мағлуб этиб, катта ғалабани қўлга киритди.
Учрашув тақдири анча эрта ҳал бўла бошлади. Ҳисобни 2-дақиқада Батурин очди — «Лацио» ҳали ўйинга киришиб улгурмаган пайтдаёқ «Комо» зарбасини еб қўйди. Шундан кейин ҳам меҳмонлар ҳужумдан тўхтамади: 24-дақиқада Пас ўз номини таблога ёздирди. У шу билан чекланиб қолмади — 49-дақиқада яна бир бор гол урди ва дубль расмийлаштирди.
Қизиғи, Пас бу кечада янада “ёриб кетиши” ҳам мумкин эди. 35-дақиқада «Комо» пенальти тепиш ҳуқуқини қўлга киритди, аммо Пас 11 метрлик зарбани голга айлантира олмади. Бироқ, ўйиннинг умумий манзараси ўзгармади: «Комо» барибир тўлиқ назоратда ўйнади ва ҳисобни ишончли тарзда сақлаб қолди.
Шу тариқа, «Комо» очколари сонини 37 тага етказиб, жадвалда 6-ўринга кўтарилиб олди. «Лацио» эса 28 очко билан 9-поғонада қолди — уйда 0:3 ҳисобида ютқазиш Римдаги мухлислар учун оғир зарба бўлгани аниқ.
А Серия. 21-тур
Лацио – Комо 0:3
Голлар: Батурин 2, Пас 24, 49
Фойдаланилмаган пеналти: Пас 35
«Лацио»: Проведел, Марушич, Жила, Романиоли, Белайн, Каталди (Ровелла, 54), Пеллегрини (Лаззари, 67), Тэйлор, Кансиллиери (Исаксен, 53), Ратков (Нослин, 53), Заккани.
«Комо»: Бутез, Смолчич (Пош, 46), Рамон, Карлос, Валле, Какре (Роберто, 67), Перроне, да Куня, Пас, Родригес, Батурин.