Мареска ҳам “Реал” рўйхатида: Зиданга ишонч энди тўлиқми?
2026 йил 1 январь куни “Челси” бош мураббийлигидан истеъфога чиқарилган италиялик мутахассис Энцо Мареска кутилмаганда Европа футболидаги энг катта курсилардан бирига яқинлашиши мумкин. Хабарларга кўра, тажрибали мураббий “Реал Мадрид” бош мураббийлиги учун кўриб чиқилаётган номзодлар рўйхатига киритилган.
Бу ҳақда Sky Sport Germany маълум қилди. Манбага кўра, “Қироллик клуби” раҳбарияти эҳтимолий вариантларни кенгайтирмоқда ва Мареска ҳам шу рўйхатдан жой олган. Яъни, бу ҳали тайинлов дегани эмас, аммо “Реал” каби клубда номи айтилиши ҳам катта сигнал.
Шу билан бирга, Мадриддаги энг афзал номзод ҳозирча ҳам Зинедин Зидан бўлиб қолмоқда. Бироқ вазият аввалгидек “идеал сценарий” эмас: айни пайтда Зидан билан клуб президенти Флорентино Перес ўртасидаги муносабатлар ўтмишдагидек мустаҳкам эмаслиги таъкидланмоқда. Устидан-устак, Зиданнинг шахсий режалари ҳам бор — у 2026 йилги жаҳон чемпионатидан кейин Франция миллий терма жамоасини бошқаришни истаяпти. Демак, вақт масаласи “Реал” учун ҳал қилувчи омилга айланиши мумкин.
Маресканинг номзод сифатида тилга олиниши ҳам бежиз эмас. У 2024 йил июлидан 2026 йил январигача “Челси”ни бошқариб, жамоа билан Конференциялар лигаси ҳамда клублар ўртасидаги жаҳон чемпионатида ғалаба қозонгани қайд этилмоқда. Яъни, у қисқа вақт ичида натижа бера оладиган, тўғри қурилган лойиҳага тез “ўтириб кетадиган” мутахассис сифатида кўрилмоқда.
Қисқаси, “Реал”даги асосий вариант ҳали ҳам Зидан, аммо клуб резерв сценарийларни ҳам тайёрлаб қўйганга ўхшайди. Мареска эса айнан шу “план Б” ёки ҳатто “план Ага айланиб кетиши мумкин бўлган вариант” сифатида кўриняпти. Футболда бир нарса аниқ: бир қарор — ва бутун манзара ўзгариб кетади.