«Майнц» футболчиси пенальтидаги серияси билан Мбаппени қувмоқда
Германия чемпионатининг 21-турида «Майнц» ўз майдонида «Аугсбург»ни қабул қилиб, 2:0 ҳисобида ғалаба қозонди. Учрашувнинг эътиборли жиҳати шундаки, ҳар икки гол ҳам пенальтилардан киритилди ва икки вазиятда ҳам ярим ҳимоячи Надим Амири аниқ зарба берди. Бу ҳақда euro-football.ru хабар беради.
Жорий мавсумда «Майнц»нинг энг сермаҳсул футболчиси бўлиб турган Амири ҳисобида 9 та гол бор, шуларнинг 7 таси 11 метрлик нуқтадан урилган. Пенальтилардан киритилган голлар сони бўйича у Европада фақат битта футболчидан ортда: мадридлик «Реал» сафида Килиан Мбаппе аллақачон 8 марта пенальтини голга айлантирган. Ҳозир «Майнц» Германия чемпионати турнир жадвалида 14-ўринда бормоқда.