Лапорта истеъфо берди: "Барселона"да сайловларга расман старт берилди
Каталониянинг «Барселона» клуби ўз расмий саҳифалари орқали Жоан Лапорта президентлик лавозимини тарк этганини маълум қилди. Бу қарор бугун бўлиб ўтган директорлар кенгаши йиғинида расмийлаштирилди ва клубдаги президентлик сайлови жараёни билан бевосита боғлиқ.
Гап шундаки, клуб низомига кўра амалдаги президент қайта сайловда қатнашиш учун вазифасини вақтинча бўшатиши керак. Шу сабабли Лапортанинг истеъфоси “фавқулодда шов-шув” эмас, балки сайловга киришиш учун зарур процедура сифатида талқин қилинмоқда.
Эндиликда клуб раҳбарлиги вақтинча биринчи вице-президент Рафаэл Юсте қўлига ўтади. У сайловлар якунланиб, янги раҳбар аниқ бўлгунча клубдаги кундалик бошқарув барқарорлигини ушлаб туриши керак бўлади.
Маълумот учун, «Барселона» президенти сайлови 2026 йил 15 март куни бўлиб ўтади. Айнан шу сана клуб “янги давр”га қайси қадам билан киришини ҳал қилади: мухлислар ва клубнинг расмий аъзолари қайси йўлни танлайди — давомийликми ёки кескин янгиланишми?
Қисқаси, клубда ҳозир “танаффус” эмас — сайлов кайфияти бошланди. Энди энг қизиқ қисми: кимлар қандай дастур билан чиқади ва март ойида «Барса» рулда кимни кўради.