Кейн Баварияда ҳамма нарса жойида эканини айтди
Мюнхеннинг «Бавария» клуби ҳужумчиси Гарри Кейн Бундеслиганинг 21-турида «Ҳоффенҳайм» устидан қозонилган йирик ғалабадан кейин фикр билдирди. 8 февраль куни (Тошкент вақти билан) бўлиб ўтган учрашувда мюнхенликлар 5:1 ҳисобида зафар қучди. Бу ҳақда euro-football.ru хабар беради.
Кейн клуб сайтига берган интервьюсида сўнгги пайтлардаги айрим омадсиз натижалар жамоа ичида босимни оширганини яширмади. Унинг таъкидлашича, «Бавария» учун энг муҳими хотиржамликни сақлаб, ўз ўйин услубидан чекинмаслик бўлган. Ҳужумчи бутун ҳафта давомида жамоа жуда интенсив ишлаганини ҳам қўшимча қилди.
Англиялик форвард жамоанинг ҳолати яхши экани майдондаги ҳаракатлардан ҳам кўриниб турганини айтди: футболчилар жисмонан тайёр ва ўйнашга чанқоқ. Кейн учрашув бошида бу айниқса сезилганини, бироқ рақиб футболчисининг четлатилиши ўйин ритмини бироз бузганини қайд этди. Унинг сўзларига кўра, «Бавария»га ўз ҳолатига қайтиш учун 15–20 дақиқа керак бўлган.
Шунингдек, Кейн «Ҳоффенҳайм»га ҳам эътироф билдирди: у бу жамоани кучли рақиб деб атади ва уларнинг футболчилари сифатли футбол намойиш этишини урғулади.
21 турдан сўнг «Бавария» 54 очко билан чемпионат жадвалида пешқадам. Дортмунднинг «Боруссия»си 48 очко жамғарган. Кейн эса тўпурарлар пойгасида 24 гол билан биринчи ўринда бормоқда.