Альбертини Сакки «Милан» даврида тактикага муккасидан кетганини айтди
Деметрио Альбертини 1988–2002 йилларда «Милан» шарафини ҳимоя қилган ва клуб тарихининг шу даврида энг машҳур мураббийлар қўл остида ишлашга улгурган. Улар орасида Арриго Сакки, Фабио Капелло ҳамда Карло Анчелотти бор. Бу ҳақда euro-football.ru хабар беради.
Альбертини 1991 йилда «Милан»ни тарк этиб, Италия терма жамоасини бошқаришга кетган Саккини алоҳида эслади.
«Сакки яхши маънода ҳақиқий “маньяк” эди. Кўп бор мени четга бошлаб, гап бошларди — мавзу доим тактика, схемалар ва ҳаракатлар ҳақида бўларди. У буларни ниҳоятда иштиёқ билан тушунтирар, кўрсатиб берарди, унда ўйинга нисбатан кам учрайдиган, ноодатий эҳтирос борлиги сезилиб турарди», — дея Альбертининң сўзларини pianetamilan.it келтирди.
Ҳозирда «Милан» Италия чемпионати турнир жадвалида иккинчи ўринда бормоқда.