Маттеус Карлнинг финтларини ҳимоя қилди ва Мессини эслатди
Мюнхеннинг «Бавария» клубининг собиқ ҳимоячиси Лотар Маттеус Бундеслигада «Хоффенхайм» устидан 5:1 ҳисобида қозонилган ғалабадан сўнг 17 ёшли иқтидор Ленарт Карлнинг ўйинига муносабат билдирди. Бу ҳақда euro-football.ru хабар беради.
Маттеуснинг айтишича, Карлнинг айрим омадсиз чиққан финтлари акс этган видео интернетда тез тарқалиб кетди. У ёш футболчи баъзан ортиқча ҳийла ишлатиб юборишини тан олса-да, айнан шундай жасорат ва креативлик мухлисларга ёқишини таъкидлади. «У футболни жуда яхши кўради, маҳоратини кўрсатишни истайди ва афсоналарнинг усулларини такрорлашга уринади. Ҳатто Месси ҳам 17 ёшида ҳамма нарсани мукаммал бажармаган. Ленарт бизларни хурсанд қилишда давом этсин», — дея Маттеуснинг сўзларини Bayern & Germany келтирди.
Жорий Бундеслига мавсумида Ленарт Карл 19 та учрашувда майдонга тушиб, 4 та гол урди ва 2 та голли узатма амалга оширди.