Фал'као «Олтин тўп»ни хоҳлаган, аммо Месси ва Роналду даври эди
«Манчестер Юнайтед», «Челси» ҳамда Мадриднинг «Атлетико» клубларида тўп сурган Радамель Фал'као «Олтин тўп»ни қўлга кирита олмаганига Лионель Месси ва Криштиану Роналду омил бўлганини айтди. Бу ҳақда euro-football.ru хабар беради.
Колумбиялик ҳужумчи 2012 йилда France Football сўровномасида бешинчи ўринни эгаллаган. Овоз беришда ундан олдинда Месси, Роналду, шунингдек Андрес Иньеста ва Хави қайд этилган.
Фал'каонинг таъкидлашича, бундай юлдузлар билан бир сафда тилга олиниши унинг учун катта фахр. У «Олтин тўп»ни ютишни истаганини, бироқ Лео ва Криштиану авлоди вакили бўлгани сабабли бу мақсадга ета олмаганини билдирди. Унинг сўзларига кўра, агар улар Испанияда ўйнамаганида, у тўпурарлар пойгасида ғолиб чиқиши ҳам мумкин эди, «Атлетико»да эса фаолиятидаги энг юқори чўққига чиққан.
Маълумот учун, Месси «Олтин тўп»ни саккиз марта қўлга киритган, Роналду эса беш бор ушбу совринни ютган.