«Барселона» Кристенсенга янги шартнома таклиф қилишини билдирди
«Барселона» спорт директори Деко жамоа даниялик ҳимоячи Андреас Кристенсенга янги шартнома вариантини тақдим этишни режалаштирмоқда. Бу ҳақда euro-football.ru хабар беради.
Деконинг айтишича, клуб футболчини ноқулай вазиятда қолдиришни истамайди: у мавсум охиригача майдонга қайтиши қийин бўлиши мумкин. Шу боис каталонияликлар Кристенсенга адолатли ва мақбул таклиф бериб, кейинги қарорни футболчининг ўзига қолдирмоқчи.
«У “Барселона”да қолишга мажбур эмас. Биз эса ҳеч бўлмаганда кўриб чиқишга арзигулик таклифни берамиз, шундан кейин у ўзи учун энг тўғри йўлни танлайди», — деди Деко матбуот анжуманида.
Кристенсен 2022 йилда «Челси»дан эркин агент сифатида «Барселона»га келиб қўшилганди. Унинг амалдаги шартномаси 2026 йил 30 июнгача мўлжалланган. Жорий мавсумда ҳимоячи 17 ўйинда майдонга тушиб, 1 гол урган. Ҳозирда у боғлам узилиши сабаб жароҳатдан тикланмоқда.