Ян Облак «Атлетико» Ла Лига пойгасидан чиқиб кетганини айтди
Мадриднинг «Атлетико» дарвозабони Ян Облак Ла Лиганинг навбатдаги турида «Райо Вальекано»га 0:3 ҳисобида мағлуб бўлгач, жамоа ўйинидан кескин норози эканини билдирди. Бу ҳақда euro-football.ru хабар беради.
Диего Симеоне шогирдлари уч кун аввал Испания Кубогида «Барселона»ни 4:0 ҳисобида йирик мағлуб этганига қарамай, чемпионатдаги бу учрашувда аутсайдерлардан бирига ютқазиб қўйди.
«Бу мавсумда биз Ла Лигани аллақачон қўлдан чиқардик. Бугунгидек ўйинларни давом эттира олмаймиз. Мағлубиятимиз тўлиқ адолатли», — дея Облакнинг сўзларини испан ОАВга таяниб «Газета.Ru» келтирди.
Ҳозирда «матрасниклар» 24 турдан сўнг 45 очко билан турнир жадвалида 4-ўринда бормоқда. Етакчилик қилаётган мадридлик «Реал»дан ортда қолиш 15 очкони ташкил этади.