Икарди хет-триги «Галатасарай» тарихида янги рекорд ўрнатди
Туркия чемпионатининг 22-турида «Галатасарай» «Эюпспор»ни йирик ҳисобда мағлуб этди — 5:1. Учрашув қаҳрамонига айланган аргентиналик ҳужумчи Мауро Икарди уч бор рақиб дарвозасини ишғол қилиб, хет-трик қайд этди. Бу ҳақда euro-football.ru хабар беради.
Бу уч гол Икардига клуб тарихидаги муҳим маррани олиб келди: у «Галатасарай»нинг энг сермаҳсул легионер тўпурари бўлди. Шу тариқа, Икарди руминлик Георге Хаджини ортда қолдирди — Хаджининг ҳисобида 75 гол бўлган бўлса, Мауро энди 76 та гол билан янги рекорд эгасига айланди.
Умумий тўпурарлар рўйхатида эса аргентиналик форвард ҳозирча еттинчи поғонани эгаллаб турибди. Эслатиб ўтамиз, Икарди 2023 йилдан бери «Галатасарай» сафида ўйнаб келмоқда, бунгача у ПСЖ таркибида тўп сурган.