Винисиус Мбаппе ва Беллингемни «Реал»га чорлаган сабабини айтди
Мадриднинг «Реал» клуби ҳужумчиси Винисиус Жуниор аввалроқ Килиан Мбаппе ва Жуд Беллингемни жамоага келишга кўндиришга ҳаракат қилганини маълум қилди. Бразилиялик футболчи буни нега қилганини ҳам тушунтирди. Бу ҳақда euro-football.ru хабар беради.
Винисиуснинг айтишича, у ҳар ёз Мбаппега хабар юбориб, «Қачон келасиз?» деб сўраб турган. «Мен гўёки унинг агенти эдим», дея кулиб эслaди ҳужумчи. Худди шундай чақириқларни Беллингемга ҳам йўллаганини қўшимча қилди.
«Мен энг кучли футболчилар билан бирга ўйнашни хоҳлайман. Шунда ғалаба қозониш имконияти ҳам кўпроқ бўлади», — дея Винисиуснинг сўзларини The Touchline келтирди.
Эслатиб ўтамиз, Мбаппе «Реал» сафида иккинчи мавсумини, Беллингем эса учинчи мавсумини ўтказмоқда.
«Реал»нинг навбатдаги учрашуви 17 февраль куни сафарда «Бенфика»га қарши Европа Чемпионлар лигаси доирасида бўлиб ўтади.