Руй Кошта: «Бенфика» тарихи инклюзивлик намунаси, дейди
Лиссабоннинг «Бенфика» клуби президенти Руй Кошта жамоа футболчиси Жанлука Престианни атрофида юзага келган можаро юзасидан муносабат билдирди. Бу ҳақда euro-football.ru хабар беради.
Престианни Мадриднинг «Реал» клуби ҳужумчиси Винисиус Жуниорга нисбатан ирқчилик қилганликда айбланмоқда. Шу сабаб футболчи Европа Чемпионлар лигасидаги 1 ўйинга вақтинча четлатилди, якуний интизомий қарор эса кейинроқ эълон қилинади.
«Бенфика» бутун тарихи давомида ирқчилик эмас, инклюзивлик тимсоли бўлиб келган. Престианни ирқчи эмас. Агар у шундай бўлганда, бу клубда тўп сурмаган бўларди. «Бенфика» таркибида ҳеч қачон ирқчилларга ўрин бўлмайди», — дея Коштанинг сўзларини Record нашри келтирди.
Чемпионлар лигаси доирасида «Реал» ва «Бенфика» ўртасидаги жавоб учрашуви 25 февраль куни бўлиб ўтади. Дастлабки баҳсда мадридликлар 1:0 ҳисобида ғалаба қозонган.