Туркияда ўйинда дарвозабон урган тўп чайкага тегди
Туркияда «Мевланакапы Гўзелхисар» ҳамда «Истанбул Юрдум Спор» жамоалари учрашувида ноодатий ҳолат кузатилди. Ижтимоий тармоқларда тарқалган видеода дарвозабон тўпни узоққа тепмоқчи бўлади, бироқ у майдон устидан учиб ўтаётган чайкага тегиб кетади. Бу ҳақда euro-football.ru хабар беради.
Воқеадан сўнг иккала жамоа футболчилари ҳам дарҳол қуш томон югуриб боради. «Истанбул Юрдум Спор» сардори Гани Чатан тезда вазиятни англаб, чайкага билвосита юрак массажи қилишга киришади.
Кейин футболчи чайкани майдон четидаги тиббиёт ходимларига топширади. Туркиянинг AA портали хабарига кўра, чайка омон қолган, бир муддат уча олмайди, аммо ветеринарларга топширилгач аста-секин соғайиб бориши кутилмоқда.