Арне Слот чуқур мудофаага қарши ўйин ҳақида фикр билдирди
«Ливерпул» бош мураббийи Арне Слот рақиблар жамоаси чуқур мудофаага ўтириб олган учрашувларда нималар муҳим бўлиши ҳақида гапирди. Бу ҳақда euro-football.ru хабар беради.
Мутахассиснинг таъкидлашича, жарима майдони ичида ўн нафар футболчи билан зич ҳимояланадиган жамоаларга қарши ўйин схемаси кўпинча ҳал қилувчи омил бўлмайди. «4-4-2ми, 5-4-1ми ёки 5-3-2ми — фарқи йўқ. Асосийси, қарши ҳужумларга йўл қўймасликка эътибор қаратиш керак», — дея Слотнинг сўзларини The Touchline Viaplay’га таяниб келтирди.
Айни пайтда «Ливерпул» Англия чемпионати турнир жадвалида олтинчи ўринда бормоқда. Мерсисайдликларнинг навбатдаги рақиби 28-февраль, шанба куни «Вест Ҳем» бўлади.