29 феврал куни туғилган юлдузлар: улар орасида Ҳусанов ҳам бор
Замонавий тақвим қоидасига кўра, 29 февраль санаси ҳар тўрт йилда бир марта келади. 2026 йил эса кабиса йили эмас, шунинг учун бу сафар февраль 28 кун билан якунланади. Айнан шу ноодатий санада туғилган Ўзбекистоннинг энг машҳур футболчиларидан бири — Абдуқодир Ҳусанов. Манбаларга кўра, у 2004 йил 29 февралда туғилган ва ҳозир “Манчестер Сити” сафида фаолият олиб бормоқда. Шу боис бу йил у табрикларни 28 февраль ёки 1 март куни қабул қилишига тўғри келади.
Хорижий манбалардан бири бўлган wionews.com сайтида жаҳон спортида 29 февраль куни дунёга келган машҳур спортчилар ҳақида махсус материал эълон қилинди. Ана шу ўзига хос ва қизиқ рўйхат — шартли айтганда, “ғаройиб бешлик” орасида Абдуқодир Ҳусановнинг номи ҳам борлиги ўзбек мухлислари учун алоҳида фахр манбаи, албатта. Чунки бугун у нафақат юртимиз, балки бутун минтақа футболи учун энг ёрқин ва энг катта умидлардан бири сифатида кўрилмоқда.
Рўйхатнинг биринчи қаҳрамони — испаниялик футболчи Ферран Торрес. У ҳам 2000 йил 29 февралда туғилган футболчилардан бири. Бугунги кунда “Барселона” сафида муҳим фигурага айланган ҳужумчи ўзининг тезлиги, серқирралиги ва ҳужум чизиғида турли позицияларда ўйнай олиши билан ажралиб туради. “Валенсия” тарбияланувчиси бўлган Торрес бир муддат “Манчестер Сити” шарафини ҳам ҳимоя қилди, кейин эса йирик трансфер эвазига Каталония гранди сафига қўшилди. Испания терма жамоасидаги самарали ўйинлари ҳам унинг даражасини яққол кўрсатиб турибди.
Иккинчи ўринда, албатта, Абдуқодир Ҳусановнинг ўзи бор. Тўрт йилда бир марта келадиган санада туғилган ўзбек ҳимоячиси қисқа вақт ичида жуда катта йўлни босиб ўтди. Ёшлар терма жамоаларидаги ишончли ва мустаҳкам ўйинлари орқали Европа клублари диққатини торта олган Ҳусанов профессионал фаолиятини Беларусда бошлади. Кейин Франциянинг “Ланс” клубига кўчиб ўтди, орадан кўп ўтмай эса Англиянинг амбицияли гранди — “Манчестер Сити” сафига қадам қўйди. У тезкорлиги, жисмоний бақувватлиги, узоқ ва қисқа масофага аниқ пас узатиши, тактик савияси ҳамда майдонни яхши кўра билиши билан эътироф этилмоқда. Бу эса уни замонавий ҳимоячилар орасида алоҳида ажратиб туради.
Рўйхатдаги яна бир таниқли ном — америкалик спортчи Эрик Кендрикс. У 1992 йил 29 февралда туғилган бўлиб, NFL — америкача футболда ёрқин карьера яратган спортчилардан бири саналади. Лайнбекер позициясида ҳаракат қилган Кендрикс етакчилик хислати, ҳимояда ақл билан ҳаракат қилиши ва барқарор ўйини билан ном чиқарган. Унинг All-Pro рамзий жамоасига киритилгани ҳам бежиз эмас. Бу — катта спортда унинг даражаси ва обрўсини кўрсатувчи муҳим белги.
Тўртинчи ўринда канадалик хоккейчи Кэмерон Уорд қайд этилган. 1984 йил 29 февралда туғилган дарвозабон NHL тарихида муносиб из қолдирган спортчилардан бири ҳисобланади. Айниқса, 2006 йили “Каролина Харрикейнз”ни тарихий илк Стэнли кубогига олиб чиққан дарвозабон сифатида унинг номи мухлислар хотирасида алоҳида сақланиб қолган. У плей-оффнинг энг қимматли ўйинчиси сифатида Конн Смайт совринига эга чиққан ва ўз даврининг энг машҳур дарвозабонлари қаторидан жой олган.
“Ғаройиб бешлик”нинг яна бир аъзоси — немис футболчиси Бенедикт Хёведес. 1988 йил 29 февралда туғилган ушбу ҳимоячи универсаллиги, етакчилик фазилатлари ва ишончли ўйини билан танилган. У “Шальке 04”да сардорлик қилган, Германия терма жамоаси сафида эса 2014 йилги жаҳон чемпионатида ғолиб чиққан таркибнинг муҳим бўлагидан бири бўлган. Бразилиядаги ўша буюк муваффақиятда Хёведеснинг ҳиссаси катта бўлгани кўпчиликка яхши маълум.
Бу каби рўйхатлар шунчаки қизиқ факт эмас, балки спорт оламида тақдир ва сана ўртасидаги ўзига хос уйғунликни ҳам кўрсатади. 29 февралда туғилиш — ноодатий ҳолат. Аммо айнан шу “кам учрайдиган” санада дунёга келган айрим спортчилар катта ареналарда жуда катта из қолдирган. Энди улар қаторида ўзбекистонлик Абдуқодир Ҳусановнинг борлиги мухлислар учун янада ёқимли эшитилади.
Қисқаси, Ҳусановнинг номи бундай нуфузли ва қизиқ рўйхатда тилга олингани — бу оддий факт эмас. Бу унинг халқаро даражада танилиб бораётгани, футбол оламида эътибор қозонаётгани ва ўзбек футболи брендини юксакроқ поғонага олиб чиқаётганининг яна бир белгиси. Табрикни 28 февралда қабул қиладими ё 1 мартда — бу иккинчи масала. Энг муҳими, 29 феврал “йигити” бугун аллақачон катта футбол саҳнасида ўз ўрнига эга.