Криштиану Роналду жароҳатдан тўлиқ соғайиб майдонга қайтди

Португалия миллий терма жамоаси ва Саудиянинг «Ан Наср» клуби ҳужумчиси Криштиану Роналду орқа сон мушаклари жароҳатидан тўлиқ тикланиб, майдонга қайтди. Бу ҳақда инсайдер Фабрицио Романо ва испан нашри Marca хабар бермоқда.

Эслатиб ўтамиз, португалиялик юлдуз 28 февралда Саудия чемпионати доирасидаги «Ал Файҳа»га қарши (3:1) учрашувда жароҳат олган ва беллашув якунида майдонни тарк этишга мажбур бўлган.

Шундан сўнг Роналду реабилитация учун Мадридга юборилди ва шахсий физиотерапевт ёрдамида тикланиш курсини олиб борди. Жароҳат туфайли у «Ан Наср»нинг чемпионатдаги бир қатор ўйинларини ўтказиб юборди ҳамда Португалия миллий жамоасининг Мексика (0:0) ва АҚШга (2:0) қарши ўртоқлик баҳсларида иштирок этмади.

Энди Роналду нафақат Саудиядаги клубига титул учун курашда ёрдам беради, балки 2026 йилги Жаҳон чемпионатида ҳам майдонга чиқиши кутилмоқда. Португалия К гуруҳидан Колумбия, Конго ДР ва Ўзбекистон билан ўрин олган.

Жорий мавсумда Роналду Саудия Пролигасида 22 та ўйинда 21 та гол урди. У бутун фаолияти давомида 965 марта гол урган ва 1000 та гол рекордига эришиш учун курашни давом эттирмоқда.