Экология буенча республика олимпиадасында Лобачевский лицее укучылары җиңде
(Казан, 10 февраль, «Татар-информ»). Лобачевский исемендәге Казан лицееның 8 сыйныф укучылары Алексей Башлай һәм Булат Идиатуллин экология буенча республика олимпиадасының йомгаклау этабында җиңде.
Экология буенча Бөтенроссия олимпиадасының йомгаклау этабы Ставрополь краенда узачак, дип хәбәр итә Татарстанның Мәгариф һәм фән министрлыгы.
2-5 февральдә Идел буе физик культура, спорт һәм туризм академиясендә 9-11 сыйныф укучылары өчен экология буенча бөтенроссия олимпиадасының төбәк этабы һәм 8 сыйныф укучылары өчен экология буенча республика олимпиадасының йомгаклау этабы узды. Бәйгедә республиканың 18 муниципаль берәмлегеннән 159 укучы катнашты.
8 сыйныф укучылары арасында экология буенча республика олимпиадасының йомгаклау этабында Казан, Арча, Бөгелмә, Яшел Үзән, Питрәч районнарыннан 12 укучы катнашты.
Экология буенча Бөтенроссия олимпиадасының төбәк этабында Казан һәм Түбән Кама районыннан 23 укучы җиңүче булды. Татарстанның Казан, Яр Чаллы, Әлмәт, Арча, Бөгелмә, Буа, Яшел Үзән, Лениногорск районнарыннан 52 укучы призлы урыннарны алды.
Олимпиадада катнашучыларның эшләрен жюри рәисе, биология фәннәре докторы, профессор Светлана Селивановская җитәкчелегендә Казан федераль университетының Экология һәм табигатьтән файдалану институты аспирантлары һәм профессор-укытучылар составы бәяләде, диелә ведомство хәбәрендә.