3 гыйнварда Башкортстанның Иглин авылындагы янгында 11 яшьлек малай имгәнә. Ике катлы агач йортта өч улы белән әни кеше яши. Янгын чыкканда өйдә 2010 елда туган малай үзе генә була. Кызганычка каршы, малай каты имгәнә. Бу турыда «Башинформ» хәбәр итте. Янгыннан соң баланы хастаханәгә китерәләр. Аның тәненең 85 проценты, үпкәләренең 50 проценты пешкән. Малай бик авыр хәлдә реанимациядә ята, аңа УФа табиблары ярдәм итә. Социаль челтәрләрдә баланы Мәскәүгә илтәргә кирәк дип язучылар бар. Ләкин табиблар фикеренчә, баланы хәзер күчереп йөртергә ярамый. «Әнисе белән дә, туганнары белән дә сөйләшеп торабыз, алар барысын да белә. Алар дәвалау тактикасы белән таныш. Бала бик авыр хәлдә, гемодинамика стабиль түгел. Тиешле бөтен ярдәм күрсәтелә. Бала стабиль түгел. Хәзерге вакытта аны кая да булса күчерү мөмкин түгел», — дип аңлаталар Сәламәтлек саклау министрлыгында. «Кешеләр, үзегезне саклагыз. Кайгы ишек какканда, бик тә, бик тә авырта. Балаларыгызны, оныкларыгызны саклагыз. Балалардан да, оныклардан да кадерлерәк кеше юк икән. Синең балаң яшәү белән үлем арасында булганда, моны сүз белән аңлатып та бетереп булмый. Йөрәктә коточкыч хисләр. Бер-берегезне саклагыз. Сәламәтлек телим», — ди баланың әбисе социаль челтәрләрдә.
