Տնտեսագետն անլուրջ է համարում թուրքական ապրանքներից հրաժարվելու գաղափարը
Տնտեսագետ Վահագն Խաչատրյանը չհաշվարկված և անլուրջ է համարում թուրքական ապրանքներից հրաժարվելու գաղափարը: Այդ մասին նա հայտարարել է VERELQ թղթակցի հետ զրույցում:
«Ինձ համար ընդհանրապես անընդունելի է որևէ երկրի դեմ էմբարգո կիրառելու պրակտիկան, եթե դրա հիմքում ընկած են ոչ թե տնտեսական հաշվարկները, այլ որևէ գաղափարական նկատառումներ ու շտամպեր: Նշանակություն չունի, որ խոսքն այս դեպքում թուրքական արտադրության մասին է»,-նշել է Խաչատրյանը: Նա կարծում է, որ ՀՀ կառավարությունն առաջին հերթին պետք է տվյալներ տրամադրի, թե որքան են թուրքական ապրանքները ներկայացված հայկական շուկայում, ինչպիսի մասնաբաժին են նրանք զբաղեցնում ընդհանուր ապրանքաշրջանառության մեջ:
«Ես կարծում եմ, որ այդ տվյալներին ծանոթանալուց հետո մեր կառավարության մոտ այդպիսի պոպուլիզմով զբաղվելու ցանկությունը կկորի»,-նշել է նա:
Խորհրդարանում ՀՀ էկոնոմիկայի նախարար Արծվիկ Մինասյանը հայտարարել էր, որ ՀՀ-ը դիտարկում է թուրքական ապրանքների ներկրումն արգելելու հարցը: Պատգամավորներից մեկն առաջարկել է կառավարությանն արգելել թուրքական ապրանքների ներկրումը, տուրիստական այցերը Թուրքիա ու փակել ուղիղ ավիաչվերթները՝ հաշվի առնելով դիվանագիտական հարաբերությունների բացակայությունն ու Անկարայի կողմից Ադրբեջանի՝ Ղարաբաղի հարցում ռազմատենչ քաղաքականությանը ցուցաբերած աջակցությունը:
Նախարարը նշել է, որ վարչապետի հանձնարարությամբ էկոնոմիկայի նախարարությունը համապատխան հետազոտություններ է իրականացնում:
Տնտեսագետի խոսքով, խնդիրը լրջորեն քննարկելու համար պետք է ուսումնասիրել վիճակագրական տվյալները: Իսկ այդ տվյալները, ըստ նրա, ցույց կտան, որ որոշակի անուն ապրանքների գծով թուրքական արտադրանքը գրեթե անփոխարինելի է, հետևաբար, դրանից հրաժարվելու համար անհրաժեշտ է ստեղծել սեփականը, այլընտրանքային արդադրանքը: «Ես չեմ բացառում, որ այդ գաղափարն առաջ է եկել իշխանությունների վերին օղակներից կամ բիզնեսից: Հավանաբար, ինչ-որ մեկը ցանկանում է հայրենասիրական կոչերի քողի տակ առաջ քաշել սեփական բիզնես շահերը»,-նշել է Խաչատրյանը:
Նրա խոսքով, անհասկանալի է, թե ինչ կլինի հասարակ քաղաքացիների հետ, ովքեր վաճառում են թուրքական արտադրան, հիմնականում տեքստիլ, իսկ այդպիսի վաճառողները տասնյակ հազարների են հասնում: «Ես չեմ ցանկանում քարեր նետել կոնկրետ մարդկանց ուղղությամբ, անկախ նրանից, նախարար է դա, թե պատգամավոր: Հարցը լուրջ է և այն պետք է մանրակրկիտ ուսումնասիրել՝ հաշվի առնելով առաջին հերթին, հասարակ քաղաքացիների շահերը»,-հավելել է նա: