Башкортстанның Баймак районында Башкорт аты музее ачарга җыеналар
(Казан, 9 февраль, «Татар-информ»). Башкортстанда Башкорт аты музее ачарга җыеналар.
Ул Баймак районында бердәнбер ХIX гасыр архитектура һәйкәле булган сәүдәгәр Кабановлар йортында урнашачак. «Башинформ» шул хакта хәбәр итте.
Башкортстан Мәдәни мирасның күчемсез объектларын саклау һәм файдалану буенча фәнни-җитештерү үзәге директоры Данир Гайнуллин сүзләренчә, Башкорт аты музее «Ирәндек» тарихи-археологик һәм ландшафт музей-тыюлыгы экспозициясенең бер өлеше булачак.
Бу һәм башка проектлар буенча фикер алышу Баймак районы башлыгы Фәнис Әминев катнашында узды. Фәнни хезмәткәрләр музей концепциясен әзерли, һәм агымдагы ел дәвамында аны гамәлгә ашырачаклар, диелә хәбәрдә.