М7 трассасында күпердәге авариядә ике кеше үлгән, дүрт кеше имгәнгән - видео
6 августта иртәнге бишенче яртылар тирәсендә М7 «Волга» юлында Сура елгасы аша күпердә «Хендай-Солярис» һәм «Киа-Риа» бәрелешә. Авария Чувашиянең Ядринский районында була. Бу турыда Чувашия буенча Эчке эшләр министрлыгы хәбәр итте.
Якынча белешмә буенча, «Хендай» белән Татарстанда яшәүче 38 яшьлек ир-ат идарә итә. Ул каршы як полосага чыга һәм «Киа» машинасына бәрелә. «Киа» белән Чабаксарда яшәүче 44 яшьлек ир-ат идарә итә. «Хендай» йөртүчесе урында ук үлә, «Киа» йөртүчесе хастаханәдә вафат була.
Машиналарның бәрелешкәнен видеорегистратор төшереп алган. Бу турыда РЕН ТВ хәбәр итте.
Кадрларда Kia белән Hyundai кара-каршы бәрелешә.
«Киа» дагы пассажир хатын-кыз, «Хендай»дагы өч пассажир имгәнә. Алар арасында 15 яшьлек кыз була, диелә хәбәрдә. Аларны хастаханәгә китергәннәр.