Яратам мин кышкы кичләрне, яратам мин ап-ак буранны
Дәү әтием
Бабакаем бар минем,
Ул бик тә кызык кеше.
Илнарларга, Гөлнарларга,
Илдарларга ул күрше.
Ул әнинең әтисе,
Апамның дәү әтисе.
Абыем белән миңа да,
Дәү әти, – дип әйтәсе.
Бабам уңган, булган кеше,
Һәр эштә ул пионер.
Хәзер хезмәт ветераны,
Лаеклы пенсионер.
Ходай аңа һуш-зиһенен,
Сәламәтлеген бирсен.
Аны караган апабыз,
Авырмый, имин йөрсен.
Гадел Нуриев, Актаныш районы, Богады мәктәбе, 2нче сыйныф.
Булышам
Мин әнигә булышам:
Табак-савыт юышам,
Идәннәрне суыртам,
Гөлләргә дә су сибәм.
Мин әнине яратам,
Сеңлемне дә карашам.
Аның эштән кайтканын
Сөенеп, көтеп алам.
Эльгина Мирзаянова, Мөслим урта мәктәбе, 5нче сыйныф.
Кыш җитте
Кыш җитте, кыш җитте,
Бер кошчык тәрәз чиртте.
Ризык сорап килдеңме,
Әллә бер хәбәр әйттең?..
Ипи валчыгы учта,
Бераз сабыр ит, кошчык.
Кыш үтәр ул, тиз үтәр,
Ямьле яз килеп җитәр!
Венера Галимова, Алабуга, 10нчы мәктәп, 9М сыйныфы, «Яшь журналистлар» берләшмәсе.
Суыктан курыкмам
Мин йоклыйм җылыда,
Бик йомшак урында.
Ә тышта җил-буран,
Ыжгыра, сызгыра.
«Сүтәм, – ди, – өеңне,
Өшетәм үзеңне.
Туңдырам кулыңны,
Кызартам йөзеңне».
Әй, буран, дулама,
Сүтәм, дип, уйлама.
Чыгармын урамга,
Бергәләп уйнарга.
Кызарыр йөзләрем,
Арганчы эшләрмен.
Мин җилгә көлеп,
Кулымны болгармын.
Суыктан курыкмам,
Көн саен уйнармын.
Әминә Гафурова, Балтач районы, Салавыч урта мәктәбе, 3нче сыйныф.
Кышка кергәндә
Кышны сагындыгызмы, дуслар,
Көздән җыйдыгызмы уңышлар?
Кишер, чөгендер, кыярлар,
Кышка җитәрлекме алар?
Кышкы салкынга түзәрсезме,
Өшеп-туңып бетмәссезме?
Җилдән, бураннан качып,
Җылы якка китмәссезме?
Көздән җыйган уңышлар,
Мулдан булды, тырыштык!
Кышкы суык куркыта алмас,
Җанда булыр тынычлык.
Булат Ишмияров, Арча районы, Сеҗе авылы.
Яратам мин
Яратам мин кояш балкыганын,
Яратам мин яңгыр яуганын,
Яңгырдан соң агач ботагыннан
Серле тамчыларның тамганын.
Яратам мин кышкы кичләрне дә,
Яратам мин шыксыз буранны,
Серле кичтә бөтерелеп яуган,
Биеп торган ап-ак карларны.
Яратам мин сандугачлы таңны,
Яратам мин чабыш атларны,
Серле төндә йолдыз атылганда
Минем өчен җаның атканны.
Яратам мин иген басуларын,
Яратам мин бодай, арышын –
Һәммә нәрсә якын күңелемә –
Рәхмәт сиңа, серле язмышым!
Резеда Сәетгәрәева, КФУ студенты, 2нче курс.
Кыш
Тәрәзәгә боз туңган,
Актәпи кайта аудан.
Борынга ак кар кунган,
Шуабыз без ак таудан.
Яңа елда һәр бала,
Елмаеп кына тора.
Яңа елда һәр кеше,
Зур-зур планнар кора.
Яңа елда балалар,
Гел шат, көләч булалар.
Биек таудан шуалар,
Җил артыннан куалар.
Ралия Сәләхова, Яңа Чишмә районы, Чаллы Башы урта мәктәбе, 6нчы сыйныф.
Саба районы Олы Арташ төп мәктәбе укучылары.
Бураннарны яратам
Яратам кыш көннәрен,
Бураннарын яратам.
Дуслар белән чана шуам,
Гөрләп тора безнең тау.
Гадел Зиннәтов.
Кыш бабай тау өйгән
«Шусыннар балалар,
Күңел ачсыннар», – диеп,
Кыш бабай биек итеп,
Кардан тау куйган өеп.
Азат Шәрипов.
Чын зоопарк
Килеп җитте кыш,
Әйдә, урамга чык.
Бик күңелле анда,
Ап-ак кар ява.
Кардан сыннар ясадык,
Аю, төлке һәм бүре.
Чын зоопарк карарсыз,
Килегез, дуслар, бире!
Язгөл Гасимуллина.
Шатлыклы көн
Бүген шатлыклы көнем –
Җиргә Яңа ел килә.
Бөтен кеше урамда,
Шатлана, уйный, көлә.
Рифат Әхмәдуллин.
Түзмәдем
Балалар чана шуа,
Тәрәзәдән күзләдем.
Киенеп чыгып киттем,
Уйнамыйча түзмәдем!
Ильмира Дәүләтова.