Ժամկետային զինծառայողը մեղադրվում է անչափահաս համակուրսեցուց սպառնալիքով մերկ լուսանկարներ ստանալու և գումար շորթելու մեջ
ՀՀ ՊՆ ժամկետային զինծառայողը մեղադրվում է համակուրսեցի աղջկանից նրա մերկ լուսանկարները պահանջելու այնուհետև դրանք չհրապարակելու համար գումար շորթելու մեջ:
Tert.am-ը Դատական տեղեկատվական համակարգից տեղեկացավ, որ մեղադրյալ Կ.Մ.-ն ՀՀ ՊՆ N զորամասում զբաղեցրել է կառավարման մարտկոցի հեռախոսային դասակի կառավարման ջոկի վարորդ-էլեկտրիկի պաշտոնը կոչումով շարքային է:
Կ.Մ. հանդիսանալով Գավառի պետական համալսարանի տարեկետման մեջ գտնվող ուսանող, 2016թ «Վկոնտակտե», իսկ 2017թ. «Ինստագրամ» սոցիալական կայքերի միջոցով կապ է հաստատել համակուրսեցի անչափահաս աղջկա հետ և իրենց հաղորդակցման վերաբերյալ նրա հարազատներին չտեղեկացնելու պատրվակով վերջինիցս պահանջել ու ստացել է նրա մերկ լուսանկարները: Այնուհետև, ըստ մեղադրանքի, Կ.Մ.-ն անչափահասի մասին մերկ լուսանկարները հրապարակելու սպառնալիքով պահանջել և ստացել է ընդհանուր առմամբ 75.000 ՀՀ դրամ գումար:
Կ.Մ.-ին մեղադրանք է առաջադրվել ՀՀ ՔՕ-ի 182-րդ հոդվածի 1-ին մասի հատկանիշներով՝ շորթումը՝ անձի կամ նրա մերձավորի մասին արատավորող կամ անձի կամ նրա մերձավորի իրավունքներին ու օրինական շահերին էական վնաս պատճառող տեղեկություններ հրապարակելու սպառնալիքով: Պատժվում է տուգանքով՝ նվազագույն աշխատավարձի չորսհարյուրապատիկից ութհարյուրապատիկի չափով, կամ կալանքով՝ առավելագույնը երեք ամիս ժամկետով, կամ ազատազրկմամբ՝ առավելագույնը չորս տարի ժամկետով:
Կ.Մ-ի նկատմամբ խափանման միջոց է ընտրվել հրամանատարության հսկողությանը հանձնելը: Քրեական գործն ուղարկվել է Ճամբարակի դատարան և ընդունվել դատավոր Մնացական Հարությունյանի վարույթ: